به‌گومانی خراپ بوون، ئاسایشی سلێمانی ده‌ستی به‌سه‌ر بڕێكی زۆر خورمادا گرتووه و ره‌وانه‌ی لیژنه هاوبه‌شه‌كانی قائیمقامیه‌تی كردووه بۆ ئه‌نجامدانی كاری پێویست به‌رامبه‌ری.
ئاوێنە، راگەیاندنی قایمقامیەتی سلێمانی: له‌لایه‌ن به‌شی ئابوری به‌ڕێوه‌به‌رایه‌تی ئاسایشی سلێمانییه‌وه، له عه‌لوه نوێكه‌ی شاری سلێمانی ده‌ستی به‌سه‌ر بڕی (27) تۆن خورمادا گرتووه كه‌گومانی خراپ بوونی لێكردووه و ره‌وانه‌ی لیژنه هاوبه‌شه‌كانی كردووه بۆ كاری پێویست.
ئه‌و خورمایه‌ی خاوه‌نه‌كه‌ی به‌نیازبووه له بازاڕه‌كانی شاری سلێمانی به‌سه‌ر هاوڵاتیاندا ساغی بكاته‌وه له‌جۆری زهدیه ، له‌لایه‌ن به‌ڕێوه‌به‌رایه‌تی خۆپاراستنی ته‌ندروستی سلێمانی پشكنینی بۆ كراوه، ده‌ركه‌وتووه شیاو خواردن نییه.
ته‌واوی خورما ده‌ست به‌سه‌رداگیراوه‌كه به‌فه‌رمانی قائیمقامی سلێمانی له‌لایه‌ن لیژنه‌ی له‌ناوبردنه‌وه له‌ناوچه‌ی تانجه‌رۆی شاری سلێمانی له‌ناوده‌برێت و خاوه‌نه‌كه‌شی روبه‌روی رێكاری یاسایی ده‌كرێته‌وه.