چراخان ڕەفیق، هاوسەری پێشوی ئاشتی هەورامی چه‌ندین كه‌یسی‌ "گه‌نده‌ڵی‌" ئاشكرا ده‌كات
  2021-07-23       4518       
چراخان ڕەفیق، هاوسەری پێشوی ئاشتی هەورامی لەچاوپێکەوتنێکدا باس له‌چه‌ندین كه‌یسی‌ "گه‌نده‌ڵی‌" ده‌كات‌و ده‌ڵێت، "زمناكۆ ناوێك كه‌ ئیش بۆ ژماره‌یه‌ك به‌رپرسی‌ پارتی‌ ده‌كات ملیارێك دۆلاری بردووەتە دەرەوەی وڵات.. نێچیرڤان بارزانی‌ هه‌ڕه‌شه‌ی‌ كوشتنی‌ لێكردم.. سەعات یەكی شەو (35) ملیۆن دۆلارمان نارد بۆ رێكخەری گشتی بزوتنه‌وه‌ی‌ گۆڕان."

ئاوێنه‌: له‌چاوپێكه‌وتنه‌كه‌یدا كه‌ لەگەڵ (درەو میدیا) ئەنجامیداوە، چراخان ڕەفیق دەڵێت، "من لە (مەسیف سەڵاحەدین) دادەنیشم، لەوێ هەرگیز شتی وا رونادات، شەو بوو خەوتبوین، هاتنەسەر ماڵەكەمان، تەقەیان لێكردین، ئەگەر پاسەوانەكانم نەبونایە ئێستا دەمێك بو كوژرابوم، دواتر لەلایەن ئاسایشەوە تەقەكەرەكان دەستگیركران، بەڵام شەوێك زیندانی كران‌و دواتر ئازادكران".


دەقی چاوپێکەوتنەکە:

كەیسی 90 ملیۆن دۆلار
ئەوانەی تەقەیان لە ماڵەكەم كرد، كەسانی سەربە گروپێك بەرپرسن كە پێیان ناخۆشە هاتومەتەوە كوردستان، ئەوان مەترسیان هەیە هۆكاری هاتنەوەكەم بۆ هەڵماڵینی نهێنییەكانیان بێت، بەڵام من هاتومەتەوە بۆ ئەوەی دوو سێ خانووم هەیە بیانفرۆشم‌و بڕۆمەوەو بەتەواوەتی كوردستان بەجێبهێڵم، سێ ساڵ بوو نەهاتبومەوە بۆ كوردستان.
كەسەكان ناسراون، سەر بە "زمناكۆ"و ئەوانەن، كە تۆمەتیان بۆ دروستكردووم، هەرچی مەلەفی نەوتی ئەم كوردستانە هەیە هەمووی لای منە، بەڵی تائێستاش، بەڵام من خاڵێكی بچوكی باس دەكەم، ئەم كەسانە هەستاون تۆمەتێكیان بۆ دروستكردووم، تۆمەتەكە ئەوەیە گوایە من بڕی (90 ملیۆن) دۆلارم لە (زمناكۆ یاسین قادر) سەندووە، ئەوان پەنجەمۆرو ئیمزای منیان ساختە كردووە، من ئاگام لەمانە هیچی نەبووە، لە (دوبە)ی كارەكەیان كردووە، دواتر ناردویانەتەوە بۆ بەغداد، من ئاگادار نەبووم، كە هاتمەوە بۆ كوردستان، پارێزەرەكانم پێیان وتم" ئەمە لەپێناو ئەوەیە هەموو دزی‌و گەندەڵییەكانیانم ئاشكراكردووە".

پارەی نەوت رەش
دەڵێن مانگانە چراخان رەفیق بایی (10 ملیۆن) دۆلار نەوتی رەش لە ئاشتی هەورامی وەردەگرێت، بەڵام ناهێڵن بەرگری لەخۆم بكەم، ئەو نەوتە رەشە كە وەرگیراوە، خۆ پارەكەی نەهاتوەتە گیرفانی منەوە، من لەمەودوا قسە دەكەم، پارە چوەتە گیرفانی (سەروەر بێتاوی)یەوە، كە هی حزب بووە بۆ كۆمەڵێك دزو جەردە بووە.
ئەو نەوتە رەشە بەناوی كۆمپانیای (زیپۆ)وە بووە، بەناوی منەوەوە وەریانگرتووە، تەحەدا ئەكەم، یەك دۆلار نەهاتووەتە گیرفانی منەوە، چووەتە گیرفانی حزبەوە. 
من كاری نەوتم كردووە، بەڵام دیارە چەندێك كارم كردووە، كۆمپانیاكەی من كۆمپانیای ( كاندید)ە، ئەم پیاوەكە (زمناكۆ یاسین قادر) دەستی گەورەكانی لەپشتە، ئەترسن دەستیان كەشف بكەم، لەبەر ئەوەی لە حكومەتەكەی مەسرور بارزانی دەترسن، ئەمانە هەستاون ناوی منیان داوە بە پۆلیسی (ئەنتەرپول)، گوایە من (90 ملیۆن) دۆلاری ئەوان قەرزارم، لە (دوبەی) دەستیان دەڕوات‌و لەوێ بڕیارەكەیان دەركردووەو لە بەغداد تەنفیزیان كردووە.
ئەم (زمناكۆ یاسین قادر) لە (هەولێر)و لە (دوبەی) دائەنیشێت، فەرمانبەرێكی لە وەزارەتی سامانە سروشتییەكان كڕیوە بەناوی (ت، ع، ح) ناوەكە لای (درەو) پارێزراوە، ئەم فەرمانبەرە كۆدی وەزارەتی سامانە سروشتییەكانی لابووە، واتە كۆدی بەرهەمە نەوتییەكانی داخڵ كردووە، بۆ نموونە نەوتەكە نابەیت، بەڵام دەڵێت بایی (100 ملیۆن) دۆلار نەوتی داخڵ كردووە، ئەم فەرمانبەرە لە كابینەی نۆیەمدا لەگەڵ ژمارەیەك كەسی تر لە وەزارەتی سامانە سروشتییەكان دەركراوە، پێشتر ئەم فەرمانبەرە لە بەرهەمە نەوتییەكان لەسەر كۆمپیۆتەر بووە، كۆمپیوتەرەكەی‌و كۆدەكەی لە ماڵەوە بووە، یەك ژمارە لێدەدات‌و تەواو. 
ئەم (زمناكۆ)یە بەهەموو كۆمپانیاكانی دەوت من بەرهەمی نەوتیتان بۆ دەهێنم بۆ وێستگەی (ئەحمەد ئیسماعیل) بۆ ئەوەی كارەبا نەكوژێتەوە، وێستگەكەی (ئەحمەد ئیسماعیل)یش كورەی هەیە، كورەكە هەر ئەوەندەی تۆزێك گەرم بێت، گازی تێدەكرێت، دوای ئەوەی گەرم بوو حەز ئەكەیت رۆنی تێبكە یان هەر مادەیەكی تر، ئەم كارە بە دوو جۆر دەكرا: 
یەكەم: جۆرێكیان داخڵی سیستەمیان دەكرد كە ئەوان بەرهەمی نەوتیان بردووە، لە (50 هەزار) تەن تەنیا (10 هەزار) تەنیان دەبردو لەوێ سامپڵیان وەردەگرت‌و پەسەندیان دەكرد بۆ براكەی (ئەحمەد ئیسماعیل)، بۆ ئەوەی لە وەزارەتی سامانە سروشتییەكان بڵێن وەرگیراوە، دواتر بەتەنكەر دەچووە ئەودیو و داخڵ نەدەكرا، براكەی (ئەحمەد ئیسماعیل) لەگەڵ (زمناكۆ) گازەكەیان دەفرۆشتەوە.
(100 ملیۆن) لیتر گاز بۆ وێستگەی كارەبای هەولێرو دهۆك‌و چەمچەماڵ دەنێردرا، لە سلێمانی بڕواناكەم ئەو غەشە كرابێت، بەڵام لە هەولێرو دهۆك ئەو غەشە كراوە، ئەم (زمناكۆ)یە تەلەفۆنی بۆ (ت، ع، ح) دەكردو دەیوت بنوسە (100 ملیۆن) لیتر گاز رۆیشتووە بۆ هەموو وێستگەكان، ئەو (100 ملیۆن) لیترە نەدەڕۆیشت، تەنیا (10 ملیۆن) لیتر ئەڕۆیشت، لەوێش براكەی (ئەحمەد ئیسماعیل) شەریك بوو، پارەكەیان دابەش دەكرد، ئەو (100 ملیۆن) لیتر گازەیان بە ترێلە گواستووەتەوەو رەقەمی سەیارەكانیشیان ساختە كردووە، پاشان چاپخانەیەكیان داناوە كۆڕێك بەڕێوەی دەبرد ناوی (ئاكار) بوو، یەكێكی تریان ناوی (ئەیاد) بوو، خزمی فەلاح مستەفا بوو، ئەمانە گروپێك بوون، (زمناكۆ) ئەو هەموو نوسراو و وەسڵانەی ساختە دەكرد، لەگەڵ (نەوزاد هادی) پارێزگاری ئەوكاتی هەولێر شەریك بوون، بەڵام وەزیری سامانە سروشتییەكان نەیدەزانێ، بەرهەمی نەوتیان دەبرد بۆ كۆمپانیای (ستێر گروپ)، لە نوسراوەكەدا دەنوسرا (200 ملیۆن) لیتر گاز، بەڵام ئەوان ئەوانەیان نەدەزانێ پارەی زیاتر دەدا بەوان‌و وای كردبوو هەموو بەرپرسەكان پشتگیری بكەن.
ئاشتی هەورامی لەم مەلەفەدا ئاگادار نەبوو، بەس پارەی خەرج دەكرد، مۆلیدە ئەهلییەكان ئەگەر بۆ نمونە (50 هەزار) لیترت خەرجبكردایە، ئەوان دەیان نوسی (100 هەزار) لیتر، ئەوە من كەشفم كرد، (زمناكۆ)و گروپەكەی ئامێرێكیان كڕی بوو بۆ وێستگەكەی (ئەحمەد ئیسماعیل) بۆ ژووری سەمپڵ وەرگرتن بۆ پشكنین، بۆ ئەوەی گازەكە ئۆكەی دەربچێت، من ئەمانەم هەموو كەشف كرد، ئەو ئامێرەم هێنایەدەرەوە بۆ ئاشتی هەورامی، ئەوەندەی نەبرد منیان كرد بە گەندەڵ، بەڵام ئاشتی هەورامی هیچی نەوت، تەنیا وتی تەحقیق دەكەم، بەڵام هیچی نەكرد.
ئەم (زمناكۆ)یە ئەو هەموو ئەوراقەی ساختەكردووە، بووە بە خاوەنی (ملیاران) دۆلار، ملیاران دۆلاری بردووەتە دەرەوە، بە تاپۆ بۆتان دەخەمەڕوو كە تەنیا لە (دوبەی)‌و (شاریقە) بەبەهای (100 ملیۆن) دۆلار موڵك‌و خانووی كڕیوە، ئەمە جگە لەوەی لە كوردستاندا ئەو هەموو موڵك‌و هۆتێلەیان هەیە، بەبەڵگەوە لەبەردەستمدایە ئەم (زمناكۆ)یە (ملیارێك) دۆلاری بردووەتە دەرەوەی وڵات.
من ئێستا ئەوەی هەمەو نیمە بە هەموو موڵك‌و ماڵمەوە خاوەنی (25 بۆ 30 ملیۆن) دۆلارم، لەكاتێكدا من خاوەنی كۆمپانیابووم‌و بەحساب "ژنە وەزیر" بووم، من پێم خۆشە بێن ماڵەكەی (مەسیف)م ببینن، ماڵەكەی (ئەڵًمانیا)م ببینن، خانویەكیشم هەیە لە (توركیا) بیبینن، بزانن حاڵی من چۆنەو هی ئەوان چۆنە.
كەیسەكەی (زمناكۆ)دا دەستی حكومەتەكەی كاك مەسرور بارزانی تێدا نییە، من راستیتان پێدەڵێم، بەڵام دەستی حكومەتی پێشووی تێدایە بەراست‌و چەپەوە، لەكابینەی نۆیەمدا ئەم پرۆسەی "كۆد"و ساختەكارییە لە وەزارەتی سامانە سروشتییەكاندا نەماوە، بەڵام هێشتا گرێبەستە گەورەكانی دەرەوەی وڵات، هەر (ئاشتی هەورامی) لە پشتەوەیە، لەبەر ئەوەی ناتوانن دەستیان لە دەستی بێتەوە، ئەم وەزیرە نوێیەی سامانە سروشتییەكان (كەمال ئەتروشی) كە دانراوە، هیچی بەدەست نییە، جگە لەو كەمە كاروبارەی ناو وەزارەتەكەی‌و خواردنی كۆمپانیاكان، ئەوەی عەقڵ تەسەوری ناكات لەم كوردستانەدا هەیە، من باسی شتێكی زۆر بچوكم كرد كە بە مەلایین دۆلاریان دزیوە. 
كۆمپانیای (ئیدریس سورچی)و (لوقمان سورچی) هەریەكەیان بەبەهای (200 بۆ 300 ملیۆن) دۆلاریان دەستكەوتووە، ئەمە بەچی، غێر بەم مەنتوجەی ناو وەزارەت، ئەمە باسی بچوكترین ئیشی ناو وەزارەتتان بۆ ئەكەم كە بە ملیارەها دۆلار براوە، ئەی گرێبەستە گەورەكان بە ترلیۆن دۆلار براوە. 
ئەمەی (زمناكۆ) كردویەتی، ئەگەر دارودەستەكانی بۆی دانەپۆش، كاك مەسرور بزانێت ئیعدامی دەكات، ، خەڵك هەیە ئەڵێت من بۆ حزب ئیش دەكەم، بوەتە بەڕێوەبەری كۆمپانیای حزب، بەڵام لە (50 ملیۆن) دۆلار، (20 ملیۆن) دۆلار دەدات بە حزب‌و (30 ملیۆن) دۆلاری دەبات بۆ خۆی‌و دەست‌و دائیرەكەی، حزبیش نازانێت، ئێستاش ئەوە بەردەوامە. 
بەڕاستی ئەمەوێت بیڵێم ئەوەی كە گەندەڵی نەكردبێت تەنیا (كاك مەسعودو كاك مەسرور)ە، بۆشیان ناپاڕێمەوە، هیچیشیان بۆ نەكردووم‌و ئەسڵەن كاك مەسرورم بە حەیاتی نەبینیوە. 

"لە توركیا تەقەم لێكرا"
لە توركیا تەقەیان لێكردم، پاشان فەرمانبەرێكی منیان كڕیبوو، لە پەیجەكەم داینا بوو گوایە لە فەرەنسا توشی روداووی هاتوچۆ بووم، ئەوە راست نەبوو، بەڵكو لە توركیا تەقەم لێكرا، سێ بۆ چوار ساڵ لەژێر عیلاجدا بووم، ئاشتی هەورامی لە پشت تەقەكردنەكەمەوە بوو.
ئێستا ناتوانم بچمەوە ئەڵمانیا لەبەر ئەوەی تەعەدام لێم دەكەن، هەموو ئەو شتانەی هەیە تەزویریان كردووە، ئەوەی لەبەرامبەر من دەكرێت هەمووی لەسەر گەندەڵی نەوتە، وا دەزانن من دەستی ئەم مافیایانە كەشف دەكەم.

"100 ماڵە خەزورانم هەبوو"
من زۆر ناخۆشیم بینیوە، ئەزانی كە من ژنی ئاشتی هەورامی بووم (100) ماڵە خەزورانم هەبوو، هەر بەرپرسەو تەلەفۆنێكی بۆ دەكردم كە لای مێردەكەت ئیمزایەكمان بۆ بكە، ئەگەر لای ئاشتی هەورامی كارەكەم بۆ نەكردنایە، رۆژی دواتر كێشەیان بۆ دروستدەكردم، هەر بەرپرسەو شتێكی ئەویست، ئەو ناوانەت پێ بڵێم عەقڵ تەسەوری ناكات، كەسێك هات وتی دەبێت (20 ملیۆن) دلارم بدەیتێ، وتم لە كوێم بوو، وتی ئەگەر نەمدەیتێ توشی هەزار بەڵات دەكەم، شت زۆرە ناوترێت، ئەگەر من ئافرەتێكی بەهێز نەبومایە ئێستا تیاچوبووم.

"35 ملیۆن دۆلار بۆ نەوشیروان مستەفا" 
پارتی جوابی نارد بۆ من‌و ئاشتی هەورامی كە دەبێت (35 ملیۆن) دۆلار ئامادە بكەین بۆ (نەوشیروان مستەفا)، ئاشتی هەورامی سەیری منی كرد وتی" لە كوێم بوو"، منیش سەیری ئاشتیم كرد وتم "لە كوێم بوو"، ئاشتی وتی" تۆ لە بازاڕدا خەڵك‌و كۆمپانیاكان دەناسیت، بەڵكو كۆی بكەیتەوە، چونكە ئێستا لەناو وەزارەت پارە نیە"، دەی تەلەفۆن بكە بۆ ئەمسەرو ئەوسەر، (35 ملیۆن) دۆلارمان پەیدا كردو هێنایانە ماڵی من، كردمانە ناو جانتاكەوە، كە دەبوو بە سەعات دوانزەو یەكی شەو، هەموو حزبەكان كە دەیان وت شەڕیانە لەگەڵ پارتیدا، خۆیان‌و شۆفێرەكانیان دەهاتنە ماڵی ئاشتی هەورامی كە ماڵی ئێمە بوو، پارەمان تەسلیم دەكردن، سەعات یەكێ شەو (35 ملیۆن) دۆلارەكەمان رادەستكردن بۆ نەوشیروان مستەفا، بەڵام بۆ رۆژی دوایی هێرشكرایە سەر ئاشتی هەورامی‌و چراخان رەفیق‌و جنێوی دنیامان پێدرا، ئاشتی وتی" با وەڵام بدەینەوە"، وتیان شتی وانییە نابێت وەڵام بدەنەوە، ئەو قسەو جنێوانە لەلایەن ئیعلام‌و سۆشیال میدیای گۆڕانەوە بوو، ئێمە نازانین بەناوی چیەوە بوو، بەڵام ئێمە لەسەرەوە ئەمرمان پێكرابوو ئەو (35 ملیۆن) دۆلارە بدەین بە نەوشیروان مستەفا.
گۆڕان‌و هەموو حزبەكانی تریش مانگانە پارەیان پێ دەدرا، چەندین جاری تریش پارەیان بۆ نێردرا. 
(عەلی حەمەساڵح) پەرلەمانتاری گۆڕان قسەی زۆری لەسەر ئێمە دەكرد، هەموو رۆژێك دەیوت ژنەكەی ئاشتی هەورامی پاڵاوگەی هەیە، نەوتە رەشەكەیان وەرگرتووە، لەگەڵ ئاشتی هەورامی لە لەندەن بوین، كێشەی دادگایكردنی "دانەغاز" هەبوو، تەلەفۆنێك بۆ ئاشتی هەورامی هات، ئاشتی وتی ئەوە (عەلی حەمەساڵح)ە، وتی ئەڵێ" لە لەندەنم‌و ئەمەوێت بتبینم، (چۆن خوا بەهەقە ئاوا دەیگێڕمەوە)، ئاشتی وتی" با بیبینم قەیچێكە، منیش وتم بۆ نایبینی، دوای چوار پێنج سەعات ئاشتی هەورامی هاتەوەو عەلی حەمەساڵحی بینی بوو، پێكەنی‌و وتی چرا" ئەزانی عەلی حەمەساڵح كۆمپانیایەكی بەریتانی بۆ هێناوم، گرێبەستێكیان بۆ بكەم‌و بەرهەمی نەوتیان بدەمێ، (20%)ی بۆ عەلی حەمەساڵح بێت‌و (70%)ی بۆ كۆمپانیا بەریتانییەكە، وتم" ئەی ئەڵێی چی بۆی دەكەیت ئەو هەموو قسەیەمان پێ دەڵێت؟" وتی" بۆی دەكەم. چۆن بۆی ناكەم ئەوە ئیشی خۆی تیایە".
دوای ئەوە بۆ ماوەیەك دیسان عەلی حەمەساڵح دەستیكردووە بە هێرش بۆسەرمان، وتم ئاشتی ئەوە چیە ؟ لە پەنای تۆوە (50 ملیۆن) دۆلاری بەردەكەوت لەو كۆمپانیا، كەچی قسەمان پێدەڵێت، عەلی داوای دەكرد بەرهەمی نەوتی بدەین بە پاڵاوگەكەی گۆڕان لە دوكان، ئاشتی هەورامی ئەوەشی بۆ كرد.
لە گەورەو بچوكی هەموو حزبەكانەوە، ئەگەر پارەو گرێبەستمان پێ نەدانایە، تۆمەت‌و موشكیلەو بەڵایان توش دەكردین، چەند ساڵە پارتی نایەڵێت من قسە بكەم، بەڵام ئیتر لەمەودوا قسە دەكەم، چونكە شتی زۆر هەیە بۆ وتن، جارێ ئەم شتە بچوكانە دەڵێم‌و شتە گەورەكان هەڵدەگرم بۆ دوایی. 
ئێستاش لەدەرەوە گرێبەستە گەورەكان هەر ئاشتی هەورامی بەڕێوەی دەبات، بەڵام بەشاراوەیی بۆ ئەوەی كەس ناوی نەبا، هەرچەندە ئێستا دۆخەكە لە رابردوو باشترەو بەشێكی زۆری گەندەڵییەكانی نەوت بڕاوە‌و زۆرێك لە بەرپرسەكان هەموو كۆستیان كەوتووە.
جگە لە (زمناكۆ)، دەیانی تر پارەی زەبەلاحیان بردووەتە دەرەوە، كاك مەسرور ئەیەوێت ئەو پارانە بهێنێتەوە، بەڵام سەری لێ تێكدەدەن‌و نایەڵن پێی بگاتەوە، بۆ نمونە من هاتومەتەوە ئەوەتا قسەم بۆ هەڵدەبەستن‌و دەڵێن قەرزارەو پارەی لایە، بۆ ئەوەی من نەگەمە كاك مەسرورو راستیەكانی پێ بڵیم.

(ت ع ح) چۆن تائێستا دەستگیرنەكراوە ؟
لەبەری ئەوەی هەمووی بۆی دائەپۆشن، بۆیە كاك مەسرور نازانێ‌و بە ئەو نەگەیشتووە، من دوو مانگە هاتومەتەوە هەموو بەرپرسەكان رۆحیان چووە، من ئەمەوێ كاك مەسرور ببینم‌و هەموو شتێكی پێ بڵێم، چونكە ئەتوانم ملیاران دۆلاری بۆ بگەڕێنمەوە، كاك مەسرور دەبێت بپرسێ كەسێكی ئاسایی كە كاتی خۆی بەرگدرو بووە، بەچی بووە بە خاوەنی ئەم ملیار دۆلارە ؟! بەچی بووە بە خاوەنی ئەوەی وەكو خۆی دەڵێ (90 ملیۆن) دۆلار بە چراخان رەفیق بدات ؟! دەبێت حكومەت لێی بپرسن تۆ (90 ملیۆن) دۆلارت لە كوێ بوو كە داوتە بە چراخان ؟! ئەم پیاوە خەڵكی لەپشتە‌و دەچن بۆلای كاك مەسرور دەڵێن ئەوە لەگەڵ چراخان ئیشیان كردووە بەیەكەوە، بەڵام بابەتەكان بەوشێوەیە نین، بۆیە بابەتەكە تێكدەدەن، چونكە دەوروپشتەكە دەستیان لە زۆرشتدا هەیە، بۆ نمونە (محەمەد عیماد) برازای شێخ ئەدهەم بارزانی پارێزەری (زمناكۆ) بووە، بە دەنگ‌و رەنگ لەبەردەستمدایە كە هاتوەتە ماڵەكەم‌و دانی بەوەداناوە زمناكۆ ئەو نوسراوانەی ساختە كردووە كە لە دادگای (دوبەی) هەیە، بۆ ئەوەی پارە لەمن بسەنێت، زمناكۆ بە (محەمەد عیماد)ی وتووە لەم كەیسەدا یارمەتیم بدە (9 ملیۆن) دۆلارت دەدەمێ، كاتێك زمناكۆ ئەم پارەیەی پێنەدا بوو، محەمەد عیماد هات بۆلای من‌و دانی نا بە شتەكاندا. 
كەسانێك هەن كارمەندی ئاسایی كۆمپانیاكانی حزبن، خاوەنی ملیۆنان دۆلارو خانوبەرەن لە كوردستان‌و توركیا‌و وڵاتان، كە قسەش دەكەی، بەرپرسان پشتگیرییان لێ دەكەن‌و دەڵێن ئەوانە بۆ حزب ئیش دەكەن، ئەمانە كۆمپانیای غازیان هەیە‌و بەناوی حزبەوە جۆرەها دزی دەكەن، من ئاگاداری زۆر شت هەم، بەڵام ناتوانم قسە بكەم، چونكە ئەوان لەسەر شتی ئاسایی دوجار ویستویانە بمكوژن.



چیرۆكی عەشقێكی نەوتاوی
من ئافرەتێكی ئەوروپی بووم، بیرم لە پارە نەئەكردەوە، هەرگیز نەئەچومە هیچ فەرمانگەیەكی حكومەتەوە، چونكە پارتی نەیئەهێشت، مەگەر هەندێك شوێن كە خەڵكی خۆیان لەگەڵم ئەنارد، كاك نێچیرڤان وتی" چرا درێلینگ-ت هەیە، بۆ بە ئاشتی ناڵێی بۆ ئەوەی مۆڵەتت بۆ بكات، منیش وتم ئاشتی كێیە ؟ وامزانی ئافرەتە. من كە كۆمپانیای نەوتیشم هەبوو سەرەنجم نەخستبوە سەر ئەوەی كێ وەزیری نەوتە، چونكە سەیری تەلەفزیۆنم نەئەكرد، هەر لەناو فڕۆكەدا بووم‌و بەڕێی وڵاتانەوە بووم، كاك نێچیرڤان وتی بڕۆ بۆ لای ئاشتی هەورامی من خۆم خەڵكت لەگەڵ ئەنێرم، منیش لەگەڵ ستافی خۆمدا چووم بۆ وەزارەت، كە چومە ژورەوە وتم ئاشتی كێیە، وامزانی ئافرەتە، وتیان ئەوە دكتۆر ئاشتییە. ئینجا زانیم ئەو پیاوەیە. من نامەوێت نكولی لەوە بكەم كە ئاشتی هەورامی مێردم بووە‌و لەڕادەبەدەر خۆشم ویستووە، بەڵام ئەوكات ئەوەی لە مێشكمدا نەبوبێت ئاشتی هەورامی بووە، بەڵام ئیتر ئەوە دڵە پەیوەندی بە پارە یاخود گەنجێتی‌و پیرییەوە نییە، رەنگە من ئافرەتێكم لەبەر ئەوەی بە منداڵی باوكی خۆمم خۆشویستووە‌و لەژیاندا نەماوە، نەخۆشییەكی وام تێدا بێت ئەو پیاوەم وەكو باوكم خۆش ویستبێت، خەڵك ئەڵێن بۆ شووت بەو پیاوە پیرە كردووە، بەڵام لای من ئاشتی هەورامی پیر نەبوو، كە چووم بۆ وەزارەت هەر سەیریشم نەكرد، بەڵام ئەو ژمارە تەلەفۆنی من‌و بەڕێوەبەری كۆمپانیای وەرگرت‌و وتی ئەو كارەتان بۆ ئەكەم، من چومەوە بۆ لەندەن‌و ئەڵمانیا‌و سێ مانگ لە دەرەوە بووم، لەو ماوەیەدا بەردەوام مەسجم بۆ ئەهات، منیش ئەوەندە سەرقاڵ بووم، گوێم پێنەئەدا، تەنیا دوو سێ وشەی مەسجەكانم ئەخوێندەوە‌و نەمئەوێرا وەڵامی نامەكان بدەمەوە، چونكە لە خەڵك ئەترسام، نامەكان بە ژمارە تەلەفۆنی "علوج" ئەهاتن، لەو ماوەیەدا بەڕێوەبەری كۆمپانیاكەم وتی:" ئەو وەزیرە كابرایەكی زۆر درۆزنە، ئیشەكەی بۆ نەكردوم"، منیش تەلەفۆنێكم بۆ ئاشتی هەورامی كردو وتم "دكتۆر بۆ ئیشەكەت بۆ نەكردوم"، وتی بەسەرچاو ئیشاڵا ئیشەكەتان بۆ ئەكەم، ئیتر هەر بەردەوام بەو ژمارە "علوجە" مەسجم بۆ ئەهات، دواتر من هاتمەوە بۆ كوردستان، لە ماڵی باپیرم بووم، بەردەوام مەسجم بۆ ئەهات، پورێكم موبایلەكەی لێ وەرگرتم‌و وتی ئەوە چییە ئەو هەموو مەسجانەت بۆ دێت، وتم بەخوا نازانم ماوەی سێ مانگە ئەو مەسجانەم بۆ دێت، ئیتر پورم بە مەسج بۆی نوسی تۆ كێیت ؟ ئەویش وایزانم من نامەكەم نوسیوە، وتی" ئەگەر تەلەفۆنت بۆ بكەم‌و بڵێم كێم ناوم ناهێنی ؟" پوریشم بۆی نوسی "نەخێر. ناوت ناهێنم"، پاش ماوەیەك تەلەفۆنەكەم زەنگی لێدا، ژمارە تەلەفۆنەكەی ئاشتی هەورامی بوو، وتم پورە تەلەفۆنەكەم بدەرێ ئەوە دكتۆر ئاشتییە، بزانم ئیشەكەی بۆ كردووم ؟ وەڵامم دایەوە، دوای سڵاو ئاشتی هەورامی وتی" چراخان ئەو مەسجانەی بۆت هاتووە، ئەوە منم، ئێستا ئەزانێ، خۆ قسە ناكەی"، من یەكسەر دەمم وشك بوو، لەترسی پورم، یەكسەر وتم" ئیشاڵا دكتۆر تەلەفۆن بۆ جەنابت ئەكەمەوە بۆ كارەكە، من لەماڵی باپیرمم"، یەكسەر تەلەفۆنەكەم داخستەوە، دوای ئەوە ئاشتی هەورامی تەلەفۆنی بۆ كردمەوە‌و وتی "شوم پێ بكە"، بەڕاستی پێكەنینم ئەهات، چونكە هیچ فیكرم لێنەكردبووەوە، پاسەوانەكانم ماوەی 17 بۆ 18 ساڵە لەگەڵمدان، بە پاسەوانەكەمم وت" ئەم پیاوە زۆر سەیرە، ئەڵێ شوم پێ بكە !!" وتم" من چۆن شو بەو پیاوە ناشیرینە ئەكەم (بەپێكەنینەوە)"، بەڵام دواتر كە شوم پێكرد وامزانی جوانترین پیاوی سەر زەوییە، ماوەی شەش مانگ بەردەوام ئەیوت شوم پێبكە، ئێمە لە توركیا بوین لەگەڵ زاواكانمان، ئیتر من بە دایكمم وت ئەو پیاوە ئەڵێ یەمە داوات‌و ئەمەوێت سەردانی ماڵتان بكەن، ئەوكاتیش هێشتا بڕیارم نەدابوو شوی پێبكەم، دایكم وتی "چۆن شتی وا ئەبێت ؟"، بەڵام زاواكانمان وتیان ئاساییە با بێت، ئەوان نەیان ئەناسی، چونكە لە ئەوروپا ژیابوون، ئیتر من شەرمم ئەكرد، وتم فەرموو وەرە بۆ ماڵمان، كە ئاشتی هەورامی هات بۆ ماڵمان دایكم پێی وت" ئەوە تۆ عەیب ناكەی، تۆ لە تەمەنی باپیری ئەم كچەدایت، تۆ عەیب ناكەی بەو پیرییەوە هاتویتە داوای ئەو كچە گەنجە ؟!! كە وای وت ئاشتی زۆر سوربووەوە، منیش زۆر بەزەیم پێیدا ئەهاتەوە، ئاشتی وتی باشە ئەگەر كچەكەتان رازی نەبێت ئەوە من ئەڕۆم، منیش لەوێدا بەزەیم پێیدا هاتەوە، سەیرێكی دایكمم كرد وتم من شوی پێ ئەكەم، بەڵام كە شوم پێكرد تا ماوەی چوار مانگ زۆر رقم لێی بوو، تەلەفۆنم بۆ دایكم‌و خوشكەكانم ئەكرد ئەموت من چیم لەخۆم كرد، من كەی رزگارم ئەبێت لەدەستی ئەم پیاوە، بەڵام دواتر ئاشتی وای لێكردم ببینە هاوڕێی یەكتر.
من دووجار مارە كراوم لە ئاشتی هەورامی (بەپێكەنینەوە)، جاری یەكەم لە توركیا مارە كرام، جاری دووەم لە كوردستان‌و لەبەردەم خاڵ‌و كەسوكارەكەمدا، لەسەر (قورئان)ێك مارە كرام لە ئاشتی هەورامی، بەڵام لەڕاستیدا من دواتر ئەو پیاوەم زۆر خۆشویست، هەرگیز چاوم لە پارە نەبووە، بەڵام من ئەوكاتە نەمئەزانی ئەم وڵاتە هەمووی مافیایە، من هەموو شتەكانم بۆ ئاشكرا ئەكرد، ئەویش ئەیوت دانیشە وازبێنە با توشی بەڵا نەبیت، ئیتر ئاشتی ئەم شتانەی قبوڵ نەكرد‌و منیان كرد بە گەندەڵ.
ئێمە زۆر تێكەڵین لەگەڵ بنەماڵەی بارزانیدا، من بەرلەوەی شوو بە ئاشتی هەورامی بكەم، كچی ئەوان بووم‌و لەگەڵ ئەوان بووم، ئەوان منیان هێنایەوە بۆ كوردستان‌و من هەر لە مەسیف سەلاحەدین بووم‌و هاتوچۆم كردووە، تا ئەو رادەیەی من گاڵتەم لەگەڵ كاك نێچیر ئەكرد، جارێكیان شەڕم بوو لەگەڵ ئاشتیدا، ڤیدیۆیەكیم گرت‌و ناردم بۆ كاك نێچیرڤان، ئەوە ئەو ڤیدیۆیە بوو كە من بە ئاشتی ئەڵێم "تەڵاقم بدە"، ئەویش ئەڵێ "ئەمڕۆ نابێ جومعەیە، الجمعە حج المساكین"، من لەم قسەیە تێنەئەگەیشتم، چونكە ئەوكات لە زمانی عەرەبیدا باش نەبووم، هەر ئەموت حەج المساكین چییە ؟ منیش وتم كاك نێچیرڤان ئەها گاڵتەم پێ ئەكات ئەڵێ "حج المساكین"، ئەو هەموو رۆژێك لەسەر كۆمەڵێك بابەتی تایبەتی خۆمان گەڵتەم پێ ئەكات، ئیتر كاك نێچیرڤان قاقای لێدا، بۆ رۆژی دواتر هەموو وەزیرەكان لەناو خۆیاندا بە ئاشتییان ئەوت "حج المساكین"، كاك نێچیرڤان ڤیدیۆكەی ناردبوو بۆ رەفیقێكی ئاشتی، ئەویش ناردبووی بۆ كەسی تر، ئیتر دواتر لە سۆشیال میدیا بڵاوبووەوە، ئەو ڤیدیۆیە كۆن بوو، چەند ساڵێك بوو رویدا بوو، من نێچیرڤان بارزانیم وەكو باوكی خۆم داناوە، هەمیشە پێم ئەوت باوكە، من وەكو كچی ئەو بنەماڵەیە بووم، هەندێكجار پروپاگەندەم بۆ ئەكرێ زۆر ناشیرینە، بنەماڵەی بارزانی منیان زۆر خۆشئەویست، هەموو جارێك كاك مەنسور ئەیوت "چرا من تۆ ئەدەم بە شوو"، بەڵام كە شوم بە ئاشتی هەورامی كرد، گەورەو بچوكی بنەماڵەی بارزانی لەعنەتیان لێكردم، كاك مەنسور وەكو برام بوو، هەموو جارێك ئەیوت" ئەتدەم بە فڵان كەس، كە كوڕێكە خەڵكی سلێمانییە"، منیش ئەموت" نەوەڵا من شوو ناكەم، هەر ئیش ئەكەم"، كە شووم بە ئاشتی كرد، گەورەو بچوكی ئەو بنەماڵەیە ئەیانوت بۆچی شووت پێكردووە، كاك نێچیرڤان بانگی كردم وتی" من ئاشتیم بەقەد هەموو دنیا خۆش ئەوێ، بەڵام چۆن پرست بە ئێمە نەكردووە ؟ وتی" تۆ كچێكی بێ سومعەیت ؟ ناشیرینی ؟ لە هیچ شتێك كەمت هەیە ؟ نەخوێندەواری ؟ وتم: نەخێر، وتی: ئەی بۆ شووت بە ئاشتی كرد ؟!! وتم: چی بكەم ئیتر نسیبە. وتی: نەخێر نسیب نییە. لەناو ئە عالەمەدا بۆ شووت بە كوڕێكی ئێمە نەكرد ؟ بۆ پرسێكت بە ئێمە نەكرد ؟!! ئیتر لەدوای ئەمە هەمویان رقیان لێهەڵگرتم.
ماوەی هاوسەرگیری من‌و ئاشتی پێنج ساڵ‌و نیوی خایاند، كە لە ئاشتی جیابومەوە، هیچ شتێكم لێ وەرنەگرت، ئەوان پلانیان لەدژم گێڕا، دەریانكردم، ئەم ماڵەی ئێستا لە مەسیف تێیدا ئەژیم، ماڵی خۆمە، كە لەگەڵ ئاشتی بووم (دار الچیافە)مان هەبوو، ئاشتی هەورامی لەگەڵ كچەكانی تەگبیریان كردبوو بۆ جیابونەوەكە، ئاشتی دوو كچی هەیە های لایڤ ئەژین، یەكێكیان كاری بازرگانی نەوت ئەكات، ئەوی تریان ریستۆرانتی هەیە، ئاشتی هەورامی پێشتر لە ژنە گەورەكەی جیابووەوە، موڵك‌و ماڵەكەی هەمووی كردبوو بەناوی ئەو ژنەوە، لەپاڵ ئەمەشدا من هارو هاج بووم، دزی كەسە گەورەمانم ئاشكرا ئەكرد، ئەمە ئاشتی نیگەران كردبوو، ئەیوت تۆ حەقت نەبێت، من دانی پێدا ئەنێم لەم كارانەدا هەڵەبووم‌و پەشیمانم، چونكە بەوهۆیەوە توشی ئەم هەموو بەڵایە بووم، لەبەرامبەردا میللەتیش وا تێناگەن‌و ئەڵێن چراخان بەهۆی ئاشتی هەورامییەوە بووە بە خاوەنی ئەم هەموو سەروەت‌و سامانە، وەكو ئەوەی پێشتر لەگەڵ رێكخراوێكی خێرخوازیدا سواری فڕۆكە بووم، بڵاویانكردەوە وتیان ئەمە فڕۆكەی تایبەتی چراخانە. من فڕۆكەی تایبەتیم هەبێت چی ئەكەم لە خانویەكی كۆندا لە مەسیف، ئەچوم بۆ ئەمریكا وەكو ئەوان لە خانوی ئاخر مۆدێلدا دائەنیشتم!!
من شتی زۆر مەترسیدارم ئاشكرا ئەكرد، كە ناتوانم باسی بكەم چونكە مەترسی لەسەر ژیانم دروست ئەكات، ئیتر ئاشتی رۆیشت بۆ لەندەن، من لە ماڵەكەی خۆمان بووم لە (دار الچیافە)، نێچیرڤان بارزانی تەلەفۆنی بۆ كردم، وتی" هەستە بڕۆ دەرەوە، ئەبێ واز لە ئاشتی بهێنیت‌و تەڵاقی خۆتی لێ وەربگری، ماوەی 24 سەعاتت بۆ دائەنێم، دەبێت كوردستان بەجێبهێڵیت"، وتم بۆ ؟ وتی" ئەمرمان بۆ هاتووە، ئەوە ئەمری كاك مەسعودە، چونكە تۆ كێشەت زۆرەو دەستوەردان لە بابەتی نەوتدا ئەكەیت، ئەمە جێگەی قبوڵكردن نییە".
من لەوكاتەدا هەڵەبووم، دەبوو تەلەفۆن بۆ "مەكتەب سەرۆك" بكەم، بەڵام زۆر سەقاڵ بووم، نەمزانی، نێچیرڤان هەڕەشەی كوشتنی لێكردم، منیش تەلەفۆنم بۆ ئاشتی كرد، ئاشتی وتی" نا نەڕۆی، شتی وانییە، درۆیە" ئاشتیش درۆی لەگەڵ كردم، دوای ئەوەی ئاشتی تەلەفۆنەكەی داخست، نێچیرڤان تەلەفۆنی بۆ كردمەوەو وتی" نابێت جارێكی تر هەرگیز تەلەفۆن بۆ ئاشتی بكەیتەوە‌و پێموتوی دەبێت كوردستان بەجێبهێڵیت". 



بەنزینی 500 دیناری 
كە ئاشتی زانی زۆر شت هەیە من ئاشكرای ئەكەم، بەردەوام دەیوت وازبێنە‌و باسی ئەو شتانە مەكە، بەڵام من هەمیشە ئەموت بۆ ستەم بكرێت، بۆ نمونە لەوكاتانەدا كە بەهۆی بەنزینی خراپەوە "فیول پەمپ"ی ئۆتۆمبیلی خەڵك دەسوتا، پێمدەوت گوناحە بۆچی خەڵك وای بەسەر بێت، پێی ئەوتم تۆ حەقت بەسەر ئەو شتانەوە نەبێت.
ساڵی 2015 من لیتری بەنزینم كرد بە (500 دینار)، ئەوكات من فشارم لە ئاشتی كرد وتم بەنزین زۆر بە هەرزان دێت، تۆ بۆچی بە گران دەیفرۆشی، من خۆم ئیشم ئەكرد‌و خەڵكی زۆر پشتیوانیان دەكردم لەناو بازاڕ، ئاشتی دەسەڵاتی نەبوو، رازیم كرد بەوەی لیتری بەنزین بە (500 دینار) بفرۆشرێ، كە ئاشتی بەم بڕیارە رازی بوو، بوو بە فەرتەنە، كام كەسەی لەناو پارتی‌و یەكێتیدا گەورە بوون لەوانە نێچیرڤان بارزانی‌و قوباد تاڵەبانی تەلەفۆنیان بۆ ئاشتی كرد‌و پێیان ئەوت چۆن شتی وا ئەبێت، ئاشتیش پیاوێكی زۆر بێغیرەتە، یەكسەر وتی" من نەبووم، چرا بووە"، كە ئاشتی وای وت، منیش لە شوێنێكی گەورەوە تەلەفۆنم بۆ هات‌و پێیان وتم "تۆ چۆن بازاڕت شكاندووە"، منیش لە ترسی ژیانی خۆم وتی" بەهۆی ئەوەی هەڵبژاردنە، بۆ ئەوەی میللەت دەنگتان بۆ بدات، بۆیە بەنزینم هەرزان كردووە"، بەم هۆیەوە عەفویان كردم. 
نەوزاد هادی پارێزگاری پێشووی هەولێر زۆر رقی لەمن بوو، كە بەنزینەكەم هەرزان كرد ئیتر چاریان نەما، نەوزاد هادییان ناردە سەر شاشەی تەلەفزیۆن‌و پێیان وت رایبگەیەنە بەنزینمان هەرزان كردووە، چونكە نەدەكرا من بچمە سەر شاشەی تەلەفزیۆن‌و ئەم بابەتە رابگەیەنم‌و خەڵك بڵێن چراخان هەرزانی كردووە، ئێستاش بەنزین بدەنە دەست من ئەتوانم نرخی یەك لیتر بكەمەوە بە (500 دینار)، من پێش ئەوەی شوو بە ئاشتی هەورامیش بكەم هەر ئیشی بەنزینم كردووە‌و ستافەكانیشم هەر ماون‌و شاهیدن، بەڵام لەراستیدا ئەوكاتانە پسپۆڕ نەبووم لە بواری بەنزیندا، تەنیا ئەوە بوو پارەكەم پێ بوو ئیشم دەكرد، بەڵام كە بووم بە هاوسەری ئاشتی هەورامی، ئاشتی كابرایەك بوو كە لەڕادەبەدەر پیاوێكی زیرەك بوو، زیرەكی ئەو پیاوە لەبواری نەوتدا لە عەقڵ دەرچووە، پێنج ساڵ‌و نیو ژنی ئاشتی بووم، ئەم ماوەیە وەكو ئەوە بوو ئەم پیاوە مامۆستام بێت‌و منیش خوێندكاری ئەو بم.
ئەوەی لە خەیاڵی مندا نەبوبێت، ئاشتی هەورامی بوو (بەپێكەنینەوە)، چونكە من زیاتر عەقڵیەتی ئەوروپیم هەیە‌و لەوێ ژیاوم، هەندێك شت هەبوو وەكو ئێستا نەبووم، چونكە من ئەوكاتانە بەردەوام لە وڵاتانی ئەوروپا لە گەشتكردندا بووم، هەرگیز تەماشای تەلەفزیۆنی كوردیم نەكردبوو، من كۆمپانیای نەوت و پاككردنەوەم هەبوو، حاویەی خۆڵەكانی سلێمانی‌و هەموو كوردستان كە سەوزو پرتەقاڵی بوو، من كڕیم كە ئێستاش هەندێكیان ماوە‌و لەسەر نوسراوە چراخان رەفیق‌و دواتر هەمویان دزی، ئەمە دیاری من بوو بۆ كوردستان، ئەگەر ئافرەتێك پارەی نەبێت ئەم دیارییە بۆ كوردستان دابین ئەكات ؟ من هەرگیز ئاگام لە ئاشتی هەورامی نەبووە‌و سەیری تەلەفزیۆنم نەئەكرد، بەڵام كۆمپانیام هەبوو، خەڵكی سلێمانی بابچن سەیری بازاڕی (چراخان رەفیق) بكەن لە پشتی بازاڕی زانكۆوە، بزانن ساڵی چەند بووە كە من ئەو بازاڕەم هەبووە، زۆر پێش ئەوە بووە شوو بە ئاشتی هەورامی بكەم باپیرم ئەو بازاڕەی بۆ دروستكردووم، پێمخۆشە خەڵك ئەو شتانە بزانن.

مەترسیم لەسەرە !
من هەرگیز ناچم بۆ هەولێر، كە كۆبونەوەشم هەبێت خەڵك دێن بۆلام لە مەسیف، ئێستا وایان لێكردوم نەڕۆمە دەرەوەی وڵات، ئەمە هەمووی دەسیسەیە، (زمناكۆ)یان فێركردووە نوسراوێكی دروستكردووە‌و ئەڵێ چراخان (90 ملیۆن) دۆلاری من قەرزارە، ئەمەش تەنیا بوختانە، ئەڵێم پەنجەمۆرو ئیمزای من ببەن بۆ تاقیگە، ئەمە چەواشەكارییەكی گەورەیە تەنیا بۆ ئەوەی نەڕۆم‌و بمترسێنن، ئێستا ئەڵێن نابێت بڕۆیتە دەرەوەی وڵات، چونكە قەدەغەی هاتوچۆت لەسەرەوە‌و ناوت لای پۆلیسی نێودەوڵەتی (ئەنتەرپول)ە، من ئەڵێم ئەم كابرایە نوسراوەكانی ساختە كردووە بۆ لێی قبوڵ ئەكەن ؟!! بەڵام راستییەكەی ئەوەیە ئەم (زمناكۆ)یە ئەوە نییە بەمن بوێرێت ئەگەر دەستێكی لە پشتەوە نەبێت، دوێنێ بۆ كارێكی تایبەتی خۆم تەلەفۆنم بۆ (رێبەر ئەحمەد) وەزیری ناوخۆ كرد، پێم وت من دوای جەژن گەشتی دەرەوەی وڵات ئەكەم، پێی وتم گەشتی چی ؟! تۆ قەدەغەی گەشتكردنت لەسەرە، وتم قەدەغەی چی ؟ وتی ئەو كابرایە ئەڵێ (90 ملیۆن) دۆلارت لایە، بە رێبەر ئەحمەدم وت: ئەوە ساختەیەو مەكتەبی كۆمەڵایەتیش ئەزانی ئەو پیاوە نوسراوی ساختە كردووە، وتی: ئەو لە بەغدادو دوبەی ئیشەكەی كردووە‌و دەسەڵاتی ئێمەی تێدا نییە، باشە با بێن هەموو ژمارە حسابییەكانی من لە هەموو وڵاتان بگەڕێن، بزانن هەرگیز (90 ملیۆن) دۆلار چوەتە سەر حسابی من یان خوشك‌و برام یان كارمەندەكانم، بۆیە وا ئەڵێم ئێستا ئەم بازرگانانە فێربون، موڵك‌و ماڵیان ئەكەن بەناوی كوڕو براو زاواكانیانەوە بۆ ئەوەی خەڵك نەزانێ، خەڵك هەبووە بەردەستی منی كردووە، نانی شەوی نەبووە بیخوات، بەبۆنەی منەوە بووە بە خاوەنی بەنزینخانەو هۆتێل، ئێستا ئەوەی ئەوانە هەیانە، من نیمە، كەچی هەر ئەوانەن ئەچن چاڵم بۆ هەڵئەكەنن، ئەمە بەهۆی ئەوەیە ئەوانە خۆیان لاوازن، نایانەوێت خەڵك بزانێ من ئەوانەم دەوڵەمەند كردووە.
زۆرترین بینراو
© 2024 Awene Online, Inc. All Rights Reserved.
×