سەرکردەیەکی بزوتنەوەی حقوق، باڵی سیاسیی کەتیبەکانی حزبوڵڵای عێراق، جەختی لەوەکردوه‌تەوە، چالاکییەکانی مۆسادی ئیسرائیل لەهەرێمی کوردستان مەترسییەکی ڕاستەقینە بۆ سەر ئاسایشی عێراق‌و ناوچەکە دروستدەکات، دەشڵێت:"هەولێر ناوەندی مۆسادی ئیسرائیلییە".

ئاوێنە: سەباح عگێلی لەلێدوانێکی ڕۆژنامەوانییدا بەپێگەی "تۆڕی هەواڵی عێراقی" ڕاگەیاندوە، بریکارەکانی مۆساد لەهەرێم لەژێر پەردەی کۆمپانیا تایبەتەکان‌و ڕێکخراوەکانی کۆمەڵگەی مەدەنیی کاردەکەن‌و ساڵانێکە دۆخی کرانەوەو بۆشایی ئەمنیی دەقۆزنەوەو بەبێ چاودێرییەکی کاریگەر بەئازادی دەجوڵێن.

عگێلی هۆشداریداوە، لەلاوازیی ئەدای دەزگا هەواڵگرییە نیشتمانییەکان لەڕوبەڕوبونەوەی ئەم دزەکردنە.

ئاماژەی بەوەشدا، تۆڕەکانی مۆساد تەنها خەریکی کۆکردنەوەی زانیاریی نین، بەڵکو لەڕێگەی ئەو بانکانەی پەیوەستن بەبەرپرسانەوە، لەقاچاخبردنی نەوت‌و فرۆشتنی بەئیسرائیل بەڕێگەی نایاسایی، تێوەگلاون.

ئەو بەرپرسەی بزوتنەوەی حقوق داوای لەحکومەتی فیدراڵیی کردوە، دەزگای هەواڵگریی نیشتمانیی چالاک بکات‌و تواناکانی پەرەپێبدات‌و بتوانێت بەنهێنی لەناو هەرێمدا کاربکات، بەمەبەستی ڕوبەڕوبونەوەی چالاکییەکانی مۆسادو پاراستنی سەروەری نیشتمانی.