دۆناڵد ترەمپ، سەرۆكی ئەمریكا رایگەیاند، رەنگە لەگەڵ ئیسرائیل بەشداری هێرشكردنە سەر ئێران بكەن و رەنگیشە نەیكەین. جەختیش دەكاتەوە كە دەبێت ئێران بەبێ هیچ مەرجێك خۆی رادەست بكات و دەشڵێت، هەفتەی داهاتو، هەفتەیەكی یەكلاكەرەوە دەبێت بۆ پرسی ئێران.
ئاوێنە: دۆناڵد ترەمپ، سەرۆكی ئەمریكا، ئێوارەی ئەمڕۆ چوارشەممە، لە لێدوانێكدا بۆ رۆژنامەنوسان لە دەرەوەی كۆشكی سپی، لەبارەی ئەوەی كە ئایا ئەمریكا لەگەڵ ئیسرائیل بەشداری دەكات لە ھێرشكردنە سەر ئێران وتی"ناتوانم ئەوە بڵێم. رەنگە ئەو كارە بكەم، رەنگە نەیشیكەم. هیچ كەسێك نازانێت من دەمەوێت چی بكەن. بەڵام دەتوانم ئەمە بڵێم: ئێران كێشەی زۆری روبەڕوبۆتەوەو دەیەوێت دانوستان بكات."
ترەمپ وتیشی، دانوستانكارانی ئێرانی پێشنیاری ئەوەیان كردوە بۆ دانوستان "بێنە كۆشكی سپی" بەڵام ئەوە قورسە.
هێمای بۆ ئەوەش كرد كە دڵنیا نییە لەوەی شەڕی ئیسرائیل و ئێران چەند دەخایەنێت.
ترەمپ دوپاتی كردەوە، "دو وشەی زۆر سادە هەن: خۆرادەستكردنی بێ مەرج"ی ئێران.
سەرۆكی ئەمریكا ئاماژەی بەوەشدا كە پێی وایە ئێرانییەكان "نیەتی خراپ"یان لەبارەی بەرنامەی ئەتۆمی وڵاتەكەیانەوە هەیە.
لەگەڵ ئەوەش هێمای بۆ ئەوە كرد كە سەرسامە بە ئێرانییەكان و لە ماوەی ژیانیدا چەندینیان بینیوە.
ترەمپ جەختیشی كردەوە كە هەفتەی داهاتو یەكلاكەرەوە دەبێت بۆ پرسی ئێران و رەنگە نەشگاتە هەفتەی داهاتو و كۆتایی ئەم هەفتەیە یەكلاكەرەوە بێت.