وەزارەتی دارایی هەرێمی كوردستان رێنمایی دارایی ژمارە (2) ی ساڵی 2025، تایبەت بە ئاسانکاریی جێبەجێکردنی یاسای خانەنشینی یەکگرتوی هەموارکراو لە هەرێمی کوردستان -عێراق ژمارە (9)ی ساڵی 2014 بڵاوكردەوە.

ئاوێنە: وەزارەتی دارایی هەرێمی كوردستان، ئەمڕۆ چوارشەممە، رێنماییە داراییەكەی بڵاوكردۆتەوە كە بەپێی ئەوە ته‌مه‌نی یاسایی خانه‌نشینی سه‌رجه‌م فه‌رمانبه‌ران له‌ هه‌رێمی كوردستان ته‌واوكردنی ته‌مه‌نی 60 ساڵیدا ده‌بێت و به‌ ڕۆژ و مانگ و ساڵ، به‌بێ ڕه‌چاوكردنی ماوه‌ی خزمه‌تی پێویست و پێویسته‌ ده‌ستبه‌جێ  ڕه‌وانه‌ی خانه‌نشینی بكرێت.

بەپێی رێنماییەكە فەرمانبەرانی گرێبەست بەڕێژەی 75%ی كەمترین ئاستی موچەی خانەنشینی خانەنشین دەكرێن بە مەرجێك خزمەتیان لە 15 ساڵ كەمتر نەبێت و تەمەنیان 50 ساڵ بێت و لێبڕینی 15 ساڵ خانەنشینی بدەن.

هەر بەپێی رێنماییەكە فەرمانبەر دەتوانێت لە چەند حاڵەتێكدا داوای خانەنشینی بكات،  لەوانە: ئەگەر هاتو تەمەنی 50 ساڵی تەواوكردبێت یان راژەكەی لە 25 ساڵ كەمتر نەبێپت.

یان ئافرەتی بەخێوكەری منداڵ بێت ئیدی جیابوەوە یان بێوەژن یان شوی كردو بێت، دەتوانێت داوای خانەنشین بون بكات بەمەرجی ئەوەی كە راژەكەی لە 15 ساڵ كەمتر نەبێت و لە دو منداڵ كەمتری نەبێت و تەمەنی منداڵەكانی لە 15 ساڵ زیاتر نەبێت و خۆی بۆ بەخێوكردنی مناڵەكان تەرخان بكات.