2019-05-17 2452
بەڕێوەبەری نەخۆشخانەی مناڵبون ئاشكرای ده‌كات كه نەشتەرگەریی منداڵبون لەسلێمانی ستانداردی جیهانیی تێپەڕاندووەو ڕێژەكەی گەیشتۆتە لە 46% كە بەپێی ستانداری جیهانی نابێت لە 20% تێبپەڕێنێت.
ئاوێنه: د. شلێر فایەق بەڕێوەبەری نەخۆشخانەی مناڵبون به‌سایتی بەڕێوەبەرایەتی گشتیی تەندروستیی سلێمانی راگه‌یاندووه، "بەخۆشحاڵیەوە شاری سلێمانی لەزۆر ڕوەوە لەخزمەتگوزارییە تەندروستییەكان باشە، تەنیا لەڕێژەی مناڵبون بەنەشتەرگەری خراپە كە ڕێژەكەی گەیشتۆتە لە 46% كە بەپێی ستانداری جیهانی نابێت لە 20% تێبپەڕێنێت.
ئاماژه بۆ ئه‌وه‌ش ده‌كات كه ئەو ڕێژەیە بۆخۆی ئامارێكی ترسناكە، دەركەوتوە بەرزبونەوەی ئەو داتایانە پەیوەندی بەنەخۆشخانە ئەهلیەكانەوە هەیە نەك نەخۆشخانەی مناڵبونی حكومی.
ئه‌و وتانه‌ی بەڕێوەبەری نەخۆشخانەی مناڵبون له‌میانه‌ی دیبه‌یتێكدا هات به‌ناونیشانی (پلانی كار لەسەر ڕێژەی نەشتەرگەری مناڵبون لەنەخۆشخانەكانی پارێزگای سلێمانی) كه بەسەرپەرشتی بەڕێوەبەرایەتی گشتی تەندروستی سلێمانی‌و نەخۆشخانەی مناڵبونی سلێمانی بەبەشداری پسپۆڕانی نەخۆشی ژنان‌و مناڵبون به‌رێوه‌چو.
د. شلێر فایەق وتیشی، ئامانجی دیبەیتەكە دروستكردنی كۆدەنگی‌و پلانی كاره لەپێناو كەمكردنەوەی ڕێژەی نەشتەرگەری مناڵبون لەسنوری شاری سلێمانی.