ئیدارەی جۆ بایدن، سەرۆكی ئەمریكا ئامادەكاری دەكات بۆئەوەی داوا لە كۆنگرێس بكات رەزامەندی نیشان بدات لەسەر فرۆشتنی فڕۆكەی ئێف 16 بە توركیا، بەرپرسانی ئەمریكا دەڵێن، فڕۆشتنی فڕۆكەی ئێف 16 بە توركیا مەرجدارە بەوەی كە ئەنقەرە رەزامەندی نیشان بدات لەبارەی ئەندامبونی سوید و فینلەندا لە ناتۆ.

ئاوێنە: بەپێی رۆژنامەی واڵ ستریت جۆرناڵی ئەمریكی، ئیدارەی جۆ بایدن ئامادەكاری دەكات بۆ ئەوەی داوای رەزامەندی كۆنگرێس بكات بۆ فرۆشتنی فڕۆكەی ئێف 16 بە بەهای 20 ملیار دۆلار بە توركیا و هەروەها فرۆشتنی فڕۆكەی ئێف 35 بە یۆنان، كە ئەوەش گەورەترین گرێبەستی فرۆشتنی چەكە لەماوەی ئەم ساڵانەی دواییدا.  

بەپێی قسەی چەند بەرپرسێكی ئەمریكی كە قسەیان بۆ رۆژنامەكە كردوە، فرۆشتنی فڕۆكەی ئێف 16 بە توركیا مەرجدارە بە رەزامەندی توركیا لەسەر ئەندامبونی سویدو فینلەندا لە ناتۆ، كە تاوەكو ئێستا ئەنقەرە رێگرە لە ئەندامبونی ئەو دو وڵاتە.

رۆژنامەكە نوسیویەتی، چاوەڕوان دەكرێت گرێبەستەكانی فرۆشتنی ئەو دو جۆر فڕۆكەیە بە توركیاو یۆنان، هەفتەی داهاتو بخرێتە بەردەم كۆنگرێس كە ئەوەش هاوكات دەبێت لەگەڵ سەردانی مەولود چاوشئۆغلۆ، وەزیری دەرەوەی توركیا بۆ واشنتۆن.

واڵ ستریت جۆرناڵ، ئاماژەی بەوەداوە كە پێدەچێت راگەیاندنی ئەو گرێبەستە ببێتە مایەی ئەوەی ئیدارەكەی بایدن روبەڕوی ناڕەزایەتی ئەو ئەندامانەی كۆنگرێس ببێتەوە كە دژی فرۆشتنی چەكن بە توركیا.

هەروەها هێمای بۆ ئەوەش كردوە كە گرێبەستی فرۆشتنەكە، زیاتر لەوەی چاوەڕێ دەكرا كە بەوتەی چەند بەپرسێكی ئەمریكی، بەپێی گرێبەستەكە 40 فڕۆكەی ئێف 16 و كۆمەڵێك كیت بۆ نوێكردنەوەی 79 فڕۆكەی ئێف 16ی توركیا لەخۆدەگرێت لەگەڵ 900 موشەكی ئاسمان بە ئاسمان و 800 بۆمب.