بافڵ تاڵەبانی، سەرۆكی یەكێتی، ئەمڕۆ پێنجشەممە، لە دەباشان لەگەڵ نوێنەرانی هەزاران مامۆستای وانەبێژی هەرێم كۆبوەوەو بەڵێیندا "خەم و كێشەكانیان لە ئەستۆ بگرن" و دەشڵێت، "لای ئێمە كەرتی پەروەردە زۆر لە نەوت و غاز گرنگترە."
ئاوێنە: بەپێی راگەیەندراوێكی نوسینگەكەی، بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان لەگەڵ نوێنەرانی هەزاران مامۆستای وانەبێژ لە هەرێم کۆبوەوە.
بەگوێرەی راگەیەندراوەكە، لە کۆبونەوەکەدا نوێنەرانی مامۆستایانی وانەبێژ لە هەرێم لەبارەی کێشەو گرفتەکانیان، دانەمەزراندن و بەهەندوەرنەگرتنی خواستەکانیان لەلایەن حکومەت و وەزارەتی پەروەردەوە، راپۆرتێکیان خستەڕو و لەچەند خاڵێکیشدا داواکارییەکانیان رونکردەوە.
وەك لە راگەیەندراوەكەدا هاتوە، لە بەرامبەردا جەلال تاڵەبانی، "پاڵپشتی خۆی و یەکێتی بۆ داواکاری مامۆستایانی وانەبێژ دەربڕی" و رایگەیاند، "یەكێتی ئەم پرسە گرنگە بەهەندوەردەگرێت، چونكە پەیوەستە بە زیاتر لە 30 هەزار مامۆستاوە كە بەشێكی گرنگ و كاریگەرن لەپرۆسەی پەروەردەو فێركردندا."
هەر بەپێی راگەیەندراوەكە، سەرۆكی یەكێتی وتیشی"نابێت چیتر خزمەت و هەوڵەكانتان نادیدە بگیرێت و كەمتەرخەمیتان دەرحەق ئەنجامبدرێت چونكە هیچ شانازییەك لە فەرامۆشكردن و نادیدەگرتنی چینێكی گرنگی كۆمەڵگەدا نییە كە پەروەردەی منداڵەكانمان دەکەن. خەرجكردنی شایستە داراییەكانیشتان هەرجارەو لەژێر ناونیشانێكدا نیشانەی سەرسوڕمانەو مافخواردنێكی ئاشكرایە."
لە راگەیەندراوەكەدا ئەوەش هاتوە، لەبارەی گرنگی پرۆسەی پەروەردە و فێركردن لە هەرێمی كوردستان، بافڵ تاڵەبانی وتی"لای ئێمە كەرتی پەروەردە زۆر لە نەوت و غاز گرنگترە، بۆیە بەڵێنتان پێدەدەین خەم و كێشەكانتان لەئەستۆ دەگرین و لە هەوڵەكانمان بۆ دەستەبەركردنی ژیانێكی شایستەو شەرەفمەندانە بەردەوام دەبین."