راگه‌یه‌ندراوێك له‌وەزارەتی سامانە سروشتییەکانه‌وه‌
  2023-03-25       619       


وەزارەتی سامانە سروشتییەکانی حکومەتی هەرێمی کوردستان ڕاگه‌یه‌ندراوێك له‌باره‌ی‌ بڕیاره‌كه‌ی‌ دادگای‌ فه‌ره‌نسی‌ بڵاوده‌كاته‌و ڕایگه‌یاندووه‌، "بریاری دادگای فەرەنسی لەبەرژەوەندی حکومەتی عێراق دژی تورکیا، ڕێگر نابێت لەپەیوەندیەکانمان لەگەڵ حکومەتی بەغدا. لەم چوارچێوەیەدا، سەردانی بەغدا دەکەینەوە بۆ گفتوگۆو چارەسەرکردنی بابەتەکانی پەیوەندیدار."

ئاوێنه‌: ده‌قی‌ ڕاگه‌یه‌ندراوه‌كه‌:

حکومەتی هەرێمی کوردستان لەم چەند مانگەی دواییدا، لەگفتوگۆو دانوستانی بەردەوامدابووە لەگەڵ حکومەتی فیدراڵ و دواجار لە سەر پرسی بودجە و نەوت وگاز ، هەردوولا گەیشتوونەتە ڕێککەوتنی سەرەتایی و لەیەکتێگەیشتنی باش کە لە چوارچێوەی دەستووردا ، ماف و شایستە دەستوورییەکانی هەرێمی کوردستان دابین دەکرێن. 

بەڕێز سەرۆکی حکومەتی هەرێمی کوردستانیش، لە پەیوەندی بەردەوامدایە لە گەڵ بەڕێز سەرۆک وەزیرانی فیدرال، لەدوای سەردانی سەرۆک وەزیرانی فیدرالیش بۆ هەرێمی کوردستان، جەخت لە چارەسەرکردنی کێشەکان لە سەر بنەمای دەستوور کرایەوە.

بریاری دادگای فەرەنسی لە بەرژەوەندی حکومەتی عێراق دژی تورکیا، ڕێگر نابێت لە پەیوەندیەکانمان لەگەڵ حکومەتی بەغدا. لەم چوارچێوەیەدا،  سەردانی بەغدا دەکەینەوە بۆ گفتوگۆ و چارەسەرکردنی بابەتەکانی پەیوەندیدار. 

لەمبارەیەوە حکومەتی هەرێم وێڕای دووپاتکردنەوەی هەڵوێستی نەگۆڕی خۆی لە دەستبەردارنەبوون لە مافە دەستوورییەکانی گەلی کوردستان، بەردەوام دەبێت لە پەیوەندیەکانی لە گەل بەغدا تا گەیشتن بە چارەسەری بنەرەتی و یاسایی و دەستووری. 

وەزارەتی سامانە سروشتییەکانی
حکومەتی هەرێمی کوردستان 
2023/3/25

زۆرترین بینراو
© 2024 Awene Online, Inc. All Rights Reserved.
×