پۆلیسی سۆران رایگەیاند، دو ژنیان دەستگیركردون بەتۆمەتی دزینی زیاتر لە 14 هەزار دۆلارو 15 ملیۆن دینار لە ماڵێكدا لە ناحیەی دیاناو دەستیش بەسەر پارە دزراوەكەدا گیراوە.
ئاوێنە: بەڕێوەبەرایەتی پۆلیسی سۆران لە راگەیەندراوێكدا وتی، سەعات 4ی بەرەبەیانی ئەمڕۆ پێنجشەممە، ھاوڵاتییەک لە نوسینگەی نەهێشتنی تاوانی دیانا سکاڵای تۆمارکردوە كە بەوتەی خۆی بری 14 ھەزار و 400 دۆلاری ئەمریکی و بڕی 15 ملیۆن و 845 ھەزار دینار لە ماڵەکەی لە ناحیەی دیانا دزراوە.
ئەوەشی خستۆتەڕو، پەراوی لێکۆڵینەوەی بۆ رێکخرا و دوای بەدواداچون و لێکۆڵینەوە توانرا تۆمەتباران دەستگیربکرێن کە پێکهاتبون لە دو ئافرەت و دەستیش بەسەر بڕی پارەی دزراودا گیرا.
پۆلیسی سۆران وتوشیەتی، دواتر بەبریاری دادوەر و بەپێی ماددەی 446 لەیاسای سزادان تۆمەتباران راگیران و لێکۆڵینەوەش بەردەوامە لەگەڵیان.