هاوسەری ئەو ژنەی توشی نەخۆشی ئەنفلۆنزای بەراز بوە لە قەزای كەلار رایدەگەیەنێت ئێستا تەندروستی هاوسەرەكەی جێگیرە، باس لەوەش دەكات نازانن چۆن ئەو ڤایرۆسە بۆ هاوسەرەكەی گواستراوەتەوە، پزیشكەكانیش پێیان وایە رەنگە ڤایرۆسەكە لەرێگەی باڵندەوە گواسترابێتەوە.
ئاوێنە: ئاسۆ مەحمود، هاوسەری ئەو ژنەی توشی نەخۆشی ئەنفلۆنزای بەراز بو بو لە قەزای كەلار بە رادیۆی "دەنگ" ی وتوە "لەسلێمانی بوین لەكاتی گەرانەوەمان بۆ ماڵی خۆمان لەكەلار، خێزانەكەم باری تەندروستی تێكچو، بۆ شەوەكەی رەوشی تەندروستی زیاتر خراپ بو، ئاماژەبەوەش دەكات بەمەبەستی چارەسەر خێزانەكەی گەیاندوەتە نەخۆشخانەی كەلارو دواتریش لەوێوە رەوانەی نەخۆشخانەی سلێمانی كراوە لەوێ بۆیان دەركەوتوە كە توشی نەخۆشی ئەنفلۆنزای بەراز بوە.
راشیدەگەیەنێت لە ئێستادا باری تەندروستی هاوسەرەكەی باشەو بەرەو باشتریش دەچێت، رەخنەش لە حكومەت دەگرێت بەوەی لەیەكەم رۆژی دەركەوتنی نەخۆشیەكە گرنگییان پێنەداوەو لەنەخۆشخانەی فاروقی پزیشكی لەسەر خەرجی خۆیان چارەسەریان كردوەو دواتر گواستویانەتەوە بۆ نەخۆشخانەی دیكە.