تیمێكی شارەزای رێكخراوی تەندروستی جیهانی و وەزارەتی تەندروستی عێراق بۆ لێكۆڵینەوە لە حاڵەتەكانی هەوكردنی پەردەی مێشكی منداڵان سەردانی سلێمانی و هەڵەبجەیان كردوە. رێكخراوەكە دەڵێت، ناوەندی حاڵەتەكانی نەخۆشییەكە دەكەوێتە سەنتەری شاری هەڵەبجەو شارۆچكەی سیروانی نزیك لە هەڵەبجە.

ئاوێنە: رێكخراوی تەندروستی جیهانی، ئەمڕۆ سێشەممە، لە راگەیەندراوێكدا وتویەتی، لەدوای بەرزبونەوەی حاڵەتەكانی هەوكردنی پەردەی مێشكی منداڵان لە پارێزگاكانی سلێمانی و هەڵەبجە لە ناوەڕاستی مانگی نیسانی ئەمساڵەوە، تیمێكی شارەزایانی رێكخراوەكەو تیمێكی وەزارەتی تەندروستی عێراق سەردانی هەردو پارێزگاكەی كرد بۆ ئەنجامدانی لێكۆڵینە لەبارەی ئەو حاڵاتانەو دانانی سنورێكی خێرا بۆ بڵاوبونەوەی نەخۆشییەكە.

رێكخراوی تەندروستی جیهانی ئاماژەی بەوەداوە كە حاڵەتەكانی نەخۆشییەكە زۆربەی لەنێو منداڵاندایەو كاریگەری نەخۆشییەكە لەسەر منداڵانی نێر دو هێندەی كاریگەرییەتی لەسەر منداڵانی مێ. وتوشیەتی"هێشتا بەرزبونەوەی حاڵەتەكان بەردەوامەو ناوەندیی نەخۆشییەكەش دەكەوێتە سەنتەری شاری هەڵەبجەو شارۆچكەی سیروانی نزیك لە هەڵەبجە."

رێكخراوی تەندروستی جیهانی وتوشیەتی، لە سەردانەكەیاندا بۆ نەخۆشخانەی وەفا لە هەڵەبجەو نەخۆشخانەی د.جەمال ئەحمەد رەشیدی منداڵان لە سلێمانی، دەركەوتوە، بەرزبونەوەیەكی كتوپڕی حاڵەتەكان لەماوەی دو هەفتەی رابردودا هەبوەو بەشێوەیەكی سەرەكیش ئەو منداڵانە توشبون كە تەمەنیان لە خوار 10 ساڵانە.

ئەوەشی خستۆتەڕو، هەر لە سەردانەكەیاندا دەركەوتوە كەمی كارمەندو دەرمان و پێداویستی پزیشكی لە هەردو نەخۆشخانەكە هەیە.

وەك لە راگەیەندراوەكەدا هاتوە، بەپێی ئەنجامە سەرەتاییەكانی تاقیگە كە پشكنین بۆ 24 نمونە كراوە، دەركەوتوە نەخۆشییەكە تێكەڵەیەكە لە بەكتریاو ڤایرۆس، لێكۆڵینەوەی تاقیگەیی زیاتر لە ئارادان بۆ گەیشتن بە ئەنجامی یەكلاكەرەوە.

هێمای بۆ ئەوەش كردوە كە لەگەڵ وەزارەتی تەندروستی، رێكخراوەكەیان هەڵدەسێت بە ئەنجامدانی راهێنان بۆ كارمەندانی تەندروستی لە سلێمانی و هەڵەبجە لە بواری شارەزایی جیاجیادا لەبارەی هەوكردنی پەردەی مێشك.

ئاماژەی بەوەشداوە كە ئەولەویەتی ئەوان لە ئێستادا دانانی سنورێكە بۆ بڵاوبونەوەی نەخۆشییەكە لەگەڵ پێشكەشكردنی چاودێرییەكی تەندروستی بەپەلەو كارا بۆ توشبوان.