بافڵ تاڵەبانی، سەرۆكی یەكێتی لەگەڵ سەرۆكی پەرلەمانی كوردستان و فراكسیۆنی یەكێتی كۆبوەوەو پشتیوانی خۆی بۆ دوپاتكردنەوەو رایگەیاند، لە دوایین کۆبونەوەی پەرلەمانی کوردستان پاڵپشت بە پەیڕەوی ناوخۆی پەرلەمان، رێگریان لە کارێکی یاساشکێنی کردو ئیرادەی خەڵکیان سەرخست و رێگرییان لە شکاندنی شکۆی پەرلەمان كرد.
ئاوێنە: بەپێی راگەیەندراوێكی نوسینگەكەی، بافڵ جەلال تاڵەبانی، سەرۆکی یەکێتیی نیشتمانیی کوردستان و هەڤاڵان رەفعەت عەبدوڵا، بڕیاردەری دەستەی کارگێڕی و ئاسۆ مامەند، کارگێڕی مەکتەبی سیاسی و قوباد تاڵەبانی، سەرپەرشتیاری سكرتاریەتی سەرۆك مام جەلال لە دەباشان پێشوازیان لە سەرۆکی پەرلەمان و فراکسیۆنی یەکێتی لە پەرلەمانی کوردستان کرد.
بەپێی راگەیەندراوەكە، بافڵ جەلال تاڵەبانی لە دەستپێکی کۆبونەوەکەدا "ستایشی رۆڵی مێژویی و ئازایانەی فراکسیۆنی یەکێتی کردو پشتیوانی تەواوی یەکێتی بۆ سەرۆکی پەرلەمان دوپاتکردەوە کە لە دوایین کۆبونەوەی پەرلەمانی کوردستان پاڵپشت بە پەیڕەوی ناوخۆی پەرلەمان، رێگریان لە کارێکی یاساشکێنی کردو ئیرادەی خەڵکیان سەرخست و رێگرییان لە شکاندنی شکۆی پەرلەمان كرد."
وتیشی، "هەڵوێستی دوێنێتان بۆ سەرخستنی ئەزمونی دیموکراسیی هەرێم مایەی شانازیی یەکێتی، دڵسۆزانی گەل و دۆستانی دیموکراسی بو کە دەیانەوێت هەڵبژاردنێکی بێگەرد لە وادەی خۆیدا بەڕێوەبچێت و یاری بە چارەنوس و دەنگی خەڵکەوە نەکرێت."
بەگوێرەی راگەیەندراوەكە، بافڵ تاڵەبانی راشیگەیاند، "لەسەرەتای دروستبونی کێشە سیاسی و یاساییەکانەوە سەبارەت بە پرسی هەڵبژاردن، یەکێتی بە ئەوپەڕی بەرپرسیارێتییەوە کاری بۆ سازان و رێککەوتنی نیشتمانی کردوە و ھەنگاوی پێویست نراوە لەنێوان هەمو لایەنە سیاسییەکاندا کە یاسای هەڵبژاردن هەموار بکرێتەوەو ھاوتەریب کۆمسیۆنیش کارابکرێتەوە. دور لە خۆسەپێنی خواستی کۆمەڵانی خەڵکی تێدا جێبەجێ بکرێت و کورسی کۆتاکان بۆ یەکلاکردنەوەی پرسە چارەنوسسازەکان بەکارنەهێرێت وەک ئەوەی دوێنێ بینیمان و بەداخەوە ئەوەی نەدەبو روبدات، رویدا."
لەبارەی نوێنەرایەتی پێکهاتەکان و هەڵبژاردنی چارەنوسی خۆیانەوە بافڵ تاڵەبانی وتی، "ئێمە لە سەرەتاوە داوامانکردوە پێکهاتەکان نوێنەرایەتی راستەقینەی خۆیان بکەن و لە ململانێ سیاسی و حزبییەکاندا بەکارنەهێنرێن."
لەبەشێکی تری وتەکانیدا بافڵ تاڵەبانی، داوای لە پەرلەمانتارانی یەكێتی کرد، "وەک هەمیشە پشتبەستو بە یاسا لە سەنگەری بەرگری لە مافەکانی خەڵکدا بن و رێگە نەدەن دامەزراوەی شەرعی و یاساییەکان بۆ بەرژەوەندی حزبی بەکاربهێنن و شکۆی دامەزراوە نیشتمانییەکان لەکەدار بکرێت."
لەکۆبونەوەکەدا بافڵ "گەشبینی خۆشی نیشاندا کە بە پشتیوانیی دڵسۆزانی گەل و وڵات ئەم دۆخەش تێدەپەڕێنین و داوایکرد، هەمولایەک بەرپرسیارانە مامەڵە لەگەڵ ئەم قۆناغە هەستیارەدا بکەن. وتیشی، دەبێت بەدیهێنانی بەرژەوەندییە نیشتمانییەکان ئەرکی لەپێشینەمان بێت."
هەر بەپێی راگەیەندراوەكە، سەرۆكی یەكێتی وتیشی، "سەرباری ئەو كێشەیەی لە پەرلەمان رویدا، یەكێتی نیشتمانیی كوردستان لەسەر باوەڕە نەگۆڕەكانی خۆی سورەو دەرگای بۆ هەمو گفتوگۆ و لێكتێگەیشتنێك كراوەیە كە ئامانج لێی چارەسەركردنی كێشەكان و بەڕێوەچونی هەڵبژاردنێكی بێگەرد بێت لە وادەی خۆیدا."