هێزە ئەمنییەكانی عێراق لەمانگی تەمموزدا ٤٥ قاچاخچیەتی دراویان لە هەر یەك لە پارێزگاكانی بەغدا، كەركوك، بەسرە و نەجەف دەستگیر كردووە، هەروەها دەست بەسەر دوو هەزار و ٥٠٠ ماستەر كارتدا گیراوە.
ئاوێنه: وەزارەتی ناوخۆی عێراق سەبارەت بە ئۆپەراسیۆنەكانی لە مانگی تەمموزدا بە مەبەستی پووچەڵكردنەوەی قاچاخچێتی دراو چارەنووسی ئەو پارانەی دەستی بەسەردا گیراوە ئامارێكی نوێی بڵاو كردەوە.
عەمید حسێن تەمیمی، بەڕێوەبەری ئۆپەراسیۆنەكانی بەرەنگاربوونەوەی تاوانە ڕێكخراوەكانی سەر بە وەزارەتی ناخۆ بەیاننامەیەكی بڵاو كردەوە، بەڕێوەبەرایەتییەكەیان توانیویەتی لەمانگی تەمموزدا ٤٥ قاچاخچێتی دراو لە هەر یەك لە پارێزگاكانی بەغدا، كەركوك، بەسرە و نەجەف دەستگیر كردووە، هەروەها دەستیان بەسەر دوو هەزار و ٥٠٠ كارتی ماستەر كارتدا گرتووە.
ئاماژەی بەوەش كراوە، ئەو كارتانەی دەستیان بەسەردا گیراوە بە هەماهەنگی لەگەڵ بانكی ناوەندی عێراق ڕێكاری یاسایییان لە بارەوە گیراوەتەبەر بۆ زانینی ئەو كەسانەی كە سودمەند دەبن لەو پارانە.
ئەوەش خراوەتەڕوو، هێزەكانی بەرەنگاربوونەوەی تاوانی ڕێكخراو توانی گواستنەوەی هەموو ئەو پارە نایاسانە پووچەڵ بكاتەوە، هەروەها هەموو ئەو پارانە بۆ حكومەت گەڕێنراوەتەوە، بەڕێوەبەرایەتیەكەیان تەنها لە نەجەف توانیویەتی ٢٣ تۆمەتبار دەستگیر بكات و دەست بەسەر هەزار و ٢٥٠ كارتی قاچاخدا بگرێت.
پێشتر وەزارەتی ناوخۆ ڕایگەیاندبوو، هۆشداری دەدەنە ئەو كەسانەی زیاتر لە كارتێك بە مەبەستی كڕینی دۆلار بەكاردەهێنن، كە ئەمەش پێچەوانەی یاسایە.