ئەندامێکى پەرلەمانى عێراق ڕایگەیاند، شاندی هەرێم داوای دوو مووچەی لە بەغدا كردووە و بەرپرسانی عێراقیش بەو داوایە رازی نەبوون، دەشڵێت، بەغداد دەیەوێت ١٠٠%ی داهاتی نانەوتی هەرێم ڕادەست بكرێت.
ئاوێنه: سروە محەمەد، ئەندامى ئەنجومەنى نوێنەرانى عێراق لە فراکسیۆنى یه‌كێتی لە لێدوانێکى ڕۆژنامەنووسیدا ڕایگەیاندووە، لە دوایین سەردانیاندا شاندی هەرێم داوای مووچەی مانگەكانی ٧ و ٨ی لە بەغدا كردووە، بەڵام بەغدا بەو داوایە ڕازیی نەبووە.
ئەو پەرلەمانتارەى عێراق باسى لەوەشکردووە، بەپێی زانیارییەكانمان محەمەد شیاع سودانی سەرۆك وەزیرانی عێراق هاتووەتە سەر هێڵ و بەڵێنیداوە مووچەی مانگێگى فەرمانبەرانی هەرێمی كوردستان بنێرێت.
لە درێژەى قسەکانیدا سروە محەمەد ئەوەشى خستووەتە ڕوو، لە ئێستادا بەغداد دەیەوێت ١٠٠%ی داهاتی نانەوتی هەرێم ڕادەستی عێراق بكرێت.
ئەوەش لە کاتێکدایە، لە چەند ڕۆژى ڕابردوودا شاندێکى حکومەتى هەرێمى کوردستان بە مەبەستى گەشتنە ڕێککەوتن لەگەڵ بەرپرسانى عێراق گەشتنە بەغدا و ماوەى سێ ڕۆژ لەگەڵ لایەنە پەیوەندیدارەکان لەبارەى پرسى مووچەى فەرمانبەران کۆبوونەوە و پاشان گەڕانەوە هەرێم.