مستەفا چاوڕەش، فەرماندەی هێزەکانی حەفتای یەکێتیی نیشتمانیی کوردستان رایگەیاند "هیچ هەنگاوێک بە ئاڕاستەی کۆکردنەوەی هێز بەرامبەر یەکتری لە نێوان یەکێتی و پارتی لە ئارادا نییە".
ئاوێنە: مستەفا چاوڕەش، فەرماندەی هێزەکانی حەفتای یەکێتیی نیشتمانیی کوردستان، ئەمڕۆ شەممە، لە لێدوانێکدا بۆ ماڵپەڕی "سپی"، رایگەیاند "راستە لەگەڵ پارتی جیاوازی و ناکۆکیمان لەبواری پێشمەرگەدا هەیە، بەڵام ئەو ناکۆکیانە نەگەیشتونەتە ئاستێک تا هێز بەرامبەر یەکتر بجوڵێنین."
فەرماندەی هێزەکانی حەفتای یەکێتی نیشتمانی کوردستان رەتیکردەوە کە لەناوچەکانی کڵاوقاسم و دۆڵی بالیسان هێزیان بەرامبەر یەکتر جوڵاندبێت و وتی "دۆخی کورد لەسەر ئاستی عێراق و ناوچەکە هێندە باش نییە، تا مەینەتییەکی تر بۆ گەلەکەمان بخولقێنین و هێز بەرامبەر یەکتر بجوڵێنین."
ئەوەش لەكاتێكدایە هەندێك راپۆرتی رۆژنامەوانی باس لەوە دەكەن كە یەكێتی و پارتی لە ناوچەكانی كڵاوقاسم و دۆڵی بالیسان هێزیان بەرامبەر بەیەكتر كۆكردۆتەوە.