قەدەغەی هاتوچۆ لە کەرکوك هەڵگیرا و ڕێگەی شارەکەش لەگەڵ هەولێر کرایەوە، ئەویش دوای ئەو خۆپیشاندانەی کە گیانلەدەستدانی سێ گەنجی کوردی لێکەوتەوە.
ئاوێنە: بەیانی ئەمڕۆ یەکشەممە، قەدەغەکردنی هاتوچۆ لە کەرکوك هەڵگیرا و دۆخی شارەکە بەرەو ئاساییبوونەوە دەچێت.
ئەوەش دوای ئەوەی کە بە بڕیاری سەرۆك وەزیرانی عێراق ڕادەستکردنەوەی بارەگاکەی پارتی بۆ کاتێکی نادیار دواخرا و عەرەب و تورکمانەکانیش کۆتاییان بە مانگرتنەکەیان هێنا و خێوەتەکانیان پێچایەوە.
هاوکات ڕێگەی هاتووچۆی کەرکوك و هەولێر کرایەوە.
کردنەوەی ڕێگاکە دوای ئەو خۆیپشاندانە هات کە دوێنی هاووڵاتییانی کورد لە کەرکوك ئەنجامیان دا و تا درەنگانی شەو بەردەوام بوو.
بە هۆی تەقەکردن لە خۆپیشاندەرانی کورد، سێ گەنج گیانیان لەدەستدا و زیاتر لە 10 کەسی دیکەش برینداربوون.