تەندروستی سلێمانی ئاماری تۆماری نەخۆشخانەی منداڵانی سلێمانی بڵاوكردەوەو دەڵێت، لە مانگی رابردودا نزیكەی هەزار حاڵەتی سكچون و رشانەوەو وشكبونەوەی منداڵان لە نەخۆشخانەكە تۆماركراون.

ئاوێنە: بەپێی ئامارێكی بەڕێوبەرایەتی گشتی تەندروستی سلێمانی، كە ئەمڕۆ هەینی بڵاوكراوەتەوە، لەماوەی مانگی ڕابردودا، لەنەخۆشخانەی د.جەمال ئەحمەد ڕەشیدی منداڵانی فێركاری لەشاری سلێمانی 15.950 منداڵی نەخۆش لەهەردو بەشی دەوامی بەیانیان و بەشی ڕاوێژكاری نەخۆشخانەكە بینراون و سەرجەمیان چارەسەری پێویستیان بۆ كراوەو لەوانە 2.553 منداڵ داخڵ كراون.

بەگوێرەی ئامارەكە، لەمانگی ڕابردودا لەنەخۆشخانەی منداڵان 965 حاڵەتی سكچون و رشانەوە و وشكبونەوەو 443 حاڵەتی هەناسەتوندی تۆماركراون، 234 منداڵ لەبەشی بەدخۆراكی و 331 منداڵ لەبەشی تیشك و دەمارو 250 منداڵ لەبەشی ڕاهێنانەوەی چارەسەری خۆراك بینراون و 186 منداڵ لەبەشی نەبەكام داخڵ كراون.

تەندروستی سلێمانی لە ئامارەكەیدا ئاماژەی بەوەشداوە، مانگی ڕابردو لەنەخۆشخانەكە 18.115 پشكنینی تاقیگەیی جۆراوجۆر و 129 پشكنینی گەشەی هۆرمۆن و 497 سۆنەر و 71 ئیكۆ ئەنجام دراون و 425 تیشك گیراون.