بەهۆی دۆخی ئەمنی و رێكارە سنوردارەكانی گەشتكردن لەئەنجامی بڵاوبونەوەی كۆرۆنا، وەزارەتی دەرەوەی ئەمریكا بڕیاریدا بە كشاندنەوەی بەشێك لە كارمەندانی باڵیۆزخانەكەی لە بەغداو كونسوڵخانەكەی لە هەولێر.

ئاوێنە: باڵیۆزخانەی ئەمریكا لەبەغدا، لەبەیاننامەیەكدا رایگەیاند: لە سۆنگەی كۆمەڵێك دۆخی ئەمنی و رێكارەكانی سنورداركردنی گەشتنی لەئاكامی بڵاوبونەوەی كۆرۆنا، وەزارەتی دەرەوەی وڵاتەكەیان بڕیاریداوە بە كشاندنەوەی كارمەندە ناسەرەكییەكان لە باڵیۆزخانەی ئەمریكا لەبەغدا، ناوەندی بەغدا بۆ پشتیوانی دیپلۆماتی و كونسوڵخانەی گشتی ئەمریكا لە هەولێر.

ئەوەشی خستۆتەڕو كە هێشتا حزمەتگوزارییەكانی ڤیزا لە بەغداو هەولێر هەڵپەسێردراون.

هەروەها ئاماژەی بەوەشداوە كە حكومەتی ئەمریكا توانایەكی سنورداری هەیە بۆ پێشكەشكردنی خزمەتگوزاری لەناكاو بە هاوڵاتیانی وڵاتەكەی لە عێراق.

لە بەشێكی دیكەی بەیاننامەكەدا، باڵیۆزخانەی ئەمریكا، داوای لەو هاوڵاتیانەی وڵاتەكەی كردوە كە لە عێراقن، چەند رێوشوێنێك بگرنەبەر، لەوانە: دەستبەجێ جێهێشتنی عێراق لەڕێگەی گەشتە بازرگانییەكانەوەو چاودێریكردنی دەزگاكانی راگەیاندنی ناوخۆ بۆ بەدەستهێنانی نوێترین پێشهاتەكان و چاوخشاندنەوە بە پلانە ئەمنییە تایبەتەكانداو ئاگاداربون لە چواردەوریان.