کۆمەڵگەی کوردی سەرەڕای ئەوەی گیرۆدەی چەندین کێشە و ئازار و نەهامەتیە سەرەڕای دەیان قەیرانی بێ چارەسەر لە ئێستاشدا جەدەلێکی گەورە لە نێوان کۆمەڵێک فەریکە ڕۆشنبیرو خۆسەپێنانی بەناو ئاینی پیرۆزی ئیسلام سەریهەڵداوە.
هەردوولا یەکتر تۆمەتبار دەکەن و تۆمەت بە یەکتردا دەبەخشنەوە بێگومان هەریەک لەم دوو توێژەش کۆمەڵە ئەجێندایەکی تایبەت و کۆمەڵە پاڵنەرێکی نهێنی لەپشت کارەکانیانەوە هەیە و مەرامی تایبەتی خۆیان لە پشتی هەموو ئەو فەوزا ئیعلامیەوە هەیە کە دەیکەن، لێرەدا من نامەوێ بڵێم کام لەم دوو چینە هەق بەدەستە بەڵام دەکرێ بڵێم نە ئەمانە پارێزەر و هەڵگری ڕۆشنگەریەکن کە کۆمەڵگەی کوردی پێ بگەیەننە کەناری ئارامی و نە کۆمەڵی دووەم ئەو پارێزەرە گرنگەن کە ئاینی پیرۆزی ئیسلام بکەنە سمبولێک و سودی لێ ببینن بۆ بەرەو پێش بردنی کۆمەڵگەی کوردی هەروەک چۆن گەلانی تر هەم سودیان لە ڕۆشنبیری بینیوەو هەم ئاینی پیرۆزی ئیسلامیشیان بە سودی گەل و نیشتمان پەیڕەو کردووە .
بەداخەوە بەناوی ڕۆشنبیری و پێشکەوتنەوە دەیان و سەدان کەیسی نائەخلاقی و دوور لە کلتوری کوردی هەیە و بەردەوامیش دووبارە دەبێتەوە کە مەرام تێیدا بەلاڕێدا بردنی گەنجان و لاوانی کوردە، لە هەمانکاتدا چەندین کەس و کەسایەتیش بەناوی پیرۆزی ئاینی ئیسلامەوە بۆ تێرکردنی حەزو ئارەزوەکانی کاری دوور لە بەهاو ڕەوشتی ئیسلام و کۆمەڵگەی کوردی پەیڕەو دەکەن و تەنها ئارەزوویانە حەزە شەخسیەکانیان تێر بکەن و کچان ژنانی پێ هەڵبەخەڵەتێنن.
لەلایەکی ترەوە بەداخەوە ڕاگەیاندن و سۆشیاڵ میدیاش زۆر نامەسئولانە وەک چەکوشێکی بەهێز لە بری بنیات نانەوە بناغەی کۆمەڵگە خەریکە تێکدەدات، من لێرەدا داوام وایە بەرپرسان و دادگاکان و ڕاگەیاندنەکان سنورێک بۆ بەزاندنی ئەم سنورانە دابنێن و با لێرەدا بوەستێت و هەموو ئەو کەسانەش ڕوو بەڕووی دادگا و لایەنی پەیوەندیدار بکرێتەوە بۆ پاراستنی کۆمەڵگەی کوردی..