وەزارەتی پێشمەرگە رایگەیاند، گرفتی پێنەدانی هاوكاری دارایی هاوپەیمانان بە بەشێك لە هێزەكانی پێشمەرگە، هیچ پەیوەندییەكی بە بڕیارەكانی وەزارەتەكەیانەوە نییەو بۆ چارەسەركردنی ئەو گرفتەش "چاوەروانی بڕیاری هاوپەیمانان دەکەن."
ئاوێنە: وەزارەتی پێشمەرگە، ئێوارەی ئەمڕۆ چوارشەممە، لە راگەیەندراوێكدا وتی"وەزارەتی پێشمەرگە لە بارەی گرفتی پێنەدانی هاوکارییە داراییەکانی هاوپەیمانان بۆ بەشێک لەهێزەکانی پێشمەرگە ڕایدەگەینێت کە ئەم گرفتە هیچ پەیوەندیێکی بە بڕیارەکانی وەزارەتی پێشمەرگەوە نییە، بەڵکو ڕاستەوخۆ پەیوەندیدارە بەشێوازی کارکردن و پێدانی هاوکاری هاوپەیمانان بە یەکە سەربازییەکان."
وەزارەتەكە وتوشیەتی"گرفتی ئەم یەکە سەربازییانەش پەیوەستە بە هەبونی ڕۆتینێکی ئەمنی هێزەکانی هاوپەیمانان، لەم بارەیەشەوە وەزارەتی پێشمەرگە هەنگاوی پێویستی ناوەو کاری جدی لەسەر کردوە."
وەزارەتی پێشمەرگە وتوشیەتی"چاوەروانی بڕیاری هاوپەیمانان دەکەین بۆ ڕێکخستنەوەو چۆنیەتی دابەشکردنی هاوکارییەکانیان بۆ یەکەکانی سەربە وەزارەتی پێشمەرگە."