هەڵمەتی دەستگیرکردنی هاوڵاتییانی کورد لەلایەن هێزە ئەمنییەکانی ئێرانەوە درێژەی هەیە، لەو چوارچێوەیەشدا، سێ هاوڵاتیی کورد لە ڕۆژهەڵاتی کوردستان دەستگیر کران، هەروەها ئەو هاوڵاتییانە بە بێ فەرمانی دادوەر دەستگیر کراون.
ڕێکخراوی مافی مرۆڤی هەرانا لەبارەی دەستگیر کردنی هاوڵاتییانی کورد لەلایەن هێزە ئەمنییەکانی ئێرانەوە لە ڕاگەیەندراوێكدا بەمجۆرە زانیارییان خستووەتەڕوو.
لە هەواڵەکەدا هاتووە، دوێنێ سەعید زەرگووشی تەمەن ٣٢ ساڵی خەڵکی ئاودانان لە سنووری پارێزگای ئیلام بە بێ فەرمانی دادوەر لەلایەن هیزە ئەمنییەکانی ئێرانەوە دەستگیر کرا و بۆ شوێنێکی نادیار گوازراوەتەوە، هەروەها ئەو هاوڵاتییە کوردە بەهۆی بڵاوکردنەوەی ڕەخنە لە تۆڕە کۆمەڵایەتییەکان دەستگیر کراوە.
ئاماژە بەوەشکراوە، هەر دوێنێ دوو هاوڵاتیی کورد بە ناوەکانی زاهیر مەحموودیان و محەمەد خزری خەڵکی گوندی شاوانەی سەر بە شارۆچکەی شنۆ لە سنووری پارێزگای ورمێ بە بێ فەرمانی دادوەر لە لایەن هێزە ئەمنییەکانی ئێرانەوە دەستگیر کران و بۆ شوێنێکی نادیار گوازراونەتەوە.
جێگای ئاماژەیە، بە پێی ئاماری ڕێکخراوەکانی مافی مرۆڤی ڕۆژهەڵاتی کوردستان، لە مانگی ئاداری ئەمساڵدا ١٢٧ هاوڵاتیی کورد و ئێران لە لایەن وەزارەتی ئیتلاعاتی ئێرانەوە دەستگیر کراون.