وتەبێژی دیداری یەکێتی ڕایدەگەیەنێت، سبەینێ‌ بە ئامادەبوونی سەرۆكی یەكێتی، دیداری یەكێتی لە سلێمانی ئەنجام دەدرێت.

ئاوێنە: کاروان گەزنەیی، وتەبێژی دیداری یەکێتی لە كۆنگرەیەكی ڕۆژناوانیدا وتی "سبەینێ‌ چوار شەممە 23ی نیسان لە سلێمانی دووەمین دیداری یەكێتی بە ئامادەبوونی بافڵ جەلال تاڵەبانی، سەرۆكی یەكێتیی نیشتمانیی كوردستان و سەرپەرشتی قوباد تاڵەبانی، سەرپەرشتیاری سكرتاریەتی سەرۆك مام جەلال ئەنجام دەدرێت".

گەزنەیی ئاماژەی بەوەشدا، دیدارەكە لە كاتژمێر 11ی سەرلەبەیانی لە هۆڵی پێشمەرگە دەستپێدەكات، كە ئامانج لێی داڕشتنی سیاسەت و ستراتیژی تازەی یەكێتی بە بەشداری كادرانی یەكێتی.

وتەبێژی دیداری سلێمانی وتیشی "یەكێتی مەبەستیەتی بۆ هەلومەرجی نوێی ناوخۆیی و ناوچەیی و خۆ گونجاندن لەگەڵ بارودۆخەكان، ستراتیژ و سیاسەتی خۆی بە بەشداری كادرەكانی دابڕێژێتەوە، كە ئەمەش مۆدێلێكی نوێیە لە حزبایەتی".

"لەماوەی ڕابردوودا 9 كۆنفڕانس لە شار و شارۆچكەكان ئەنجام دراوە بە بەشداری زیاتر لە 12 هەزار كادری ئۆرگانە جیاجیاكانی یەكێتی، كە تیایدا 70 پڕۆژە و زیاتر لە 2 هەزار سەرنج و پێشنیاز پێشكەش كراون". کاروان گەزنەیی وای وت

ناوبراو راشیگەیاند "بەیانی زیاتر لە 5 هەزار كادری یەكێتی بەشداری دیداری دووەمی یەكێتی دەكات، داوایان لێدەكەین پابەندی ڕێنماییەكانی هاتووچۆ و ژینگەییەكان و هێزە ئەمیینەكان و ئاگاداری ڕۆژنامەنووسان بن تاوەكو لە كەشێكی ئارامدا دیدارەكە بەڕێوەبچێت بە ڕەچاو كردنی دۆخی خەڵكی سلێمانی".