وەزیری دەرەوەی فەرەنسا بانگهێشتی مەسعود بارزانی، سەرۆكی پارتی بۆ سەردانی پاریس دەكات بۆ ئامادەبون لە رێوڕەسمی پەردەلادان لەو شوێنەی كە بەمەبەستی رێزگرتن لە قوربانییەكانی هێزی پێشمەرگە لەشەڕی دژبە داعش لە یەكێك لە پاركەكانی پایتەختی فەرەنسا دەكرێتەوە.
ئاوێنە: ئێوارەی ڕۆژی چوارشەممە لە سەڵاحەدین، مەسعود بارزانی، سەرۆكی پارتی پێشوازی لە ژان نوێل بارۆ، وەزیری دەرەوەی فەرەنسا كرد.
بەپێی راگەیەندراوێكی بارەگای بارزانی، لە دیدارەكەدا بارودۆخی ناوخۆی هەرێم و پێویستیی پێكهێنانی كابینەی تازەی حكومەتی هەرێم لە زوترین كات خرایە بەرباس و گفتوگۆ و هەڵسەنگاندن بۆ پەیوەندییەكانی هەرێم و بەغدا و هەڵبژاردنەكانی داهاتوی ئەنجومەنی نوێنەرانی عێراق و هەروەها بارودۆخی ناوچەكە و سوریا كرا.
لە راگەیەندراوەكەدا هاتوە، پەیوەست بە بارودۆخی سوریا و داهاتوی كورد لەو وڵاتە جەخت لە سەرخستنی هەوڵەكان بۆ گفتوگۆ و نێوەندگیری و یەكڕیزی نێوان لایەنە كوردییەكانی سوریا كرایەوە.
لەبارەی پڕۆسەی ئاشتیی توركیا، مەسعود بارزانی "هەنگاو و هەوڵەكانی بۆ چارەسەری ئاشتیانە لە توركیا بەرز نرخاند و ڕاشیگەیاند هەرێمی كوردستان هەمیشە ئامادە و پشتیوانی هەمو هەوڵێكە كە پڕۆسەی ئاشتی لە توركیا بگەیێنێتە ئەنجام."
بەپێی راگەیەندراوەكە، لە كۆتایی دیدارەكەدا وەزیری دەرەوەی فەرەنسا بە فەرمی بانگهێشتی مەسعود بارزانی كرد بۆ سەردانی پاریس بۆ ئامادەبون لە رێوڕەسمی پەردەلادان لەو شوێنەی كە بە مەبەستی ڕێزگرتن لە قوربانیدانی هێزی پێشمەرگەی كوردستان لە شەڕی دژی تیرۆریستان لە یەكێك لە پاركەكانی پاریس دەكرێتەوە.