لە چاکسازییەکانی هەرێمی کوردستاندا، زیاتر لە پێنج هەزار سزادراو هەن. لەو ژمارەیەش بەگوێرەی رێنماییەکانی رێگەپێدان و بەبۆنەی جەژنی قوربانەوە، 16 حوکمدراو بە مۆڵەت نێردراونەتە ماڵەوە.
ئاوێنە: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان، ئەمڕۆ هەینی، رایگەیاند، "لە چاکسازیی گەورانی سلێمانی هەشت حوکمدراو؛ هەولێر پێنج حوکمدراو و لە دهۆکیش سێ حکومدراو مۆڵەتیان وەرگرتوە بۆ جەژن بەشێوەیەکی کاتی لە ماڵەوەبن".
لە بەرامبەردا، هیچ کەسێک لە چاکسازییەکانی ژنان و منداڵان لە هەولێر، سلێمانی و دهۆک "بە مۆڵەت نەچوەتە دەرەوە."
ئەو کەسانەی کەیسی دادگایان یەکلابوەتەوە و سزادراون لە چاکسازییەکانی هەرێمی کوردستان، سێ مانگ جارێک بۆیان هەیە داوای مۆڵەتی یەک هەفتە دەرچون لە زیندان بکەن، بەو مەرجەی چارەکێکی حوکمەکەیان تەواو کردبێت و چەند مەرجێکی دیکەی لاوەکیشیان تێدا بێت.
بە وتەی ئیحسان عەبدولڕەحمان، "ئەوانەی بە تاوانی تیرۆر، رفاندنی خەڵک و کوشتن حوکمدراون مافیان نییە داوای مۆڵەتی چونە دەرەوە بکەن".