وەزارەتی تەندروستی هەرێم، ئەمڕۆ دوشەممە، ئاشكرایكرد، حاڵەتێكی دیكەی توشبون بە تای خوێنبەربون لە شاری سلێمانی تۆماركرا كە پیاوێكی تەمەن 41 ساڵانە.

ئاوێنە: وەزارەتی تەندروستی هەرێم لە راگەیەندراوێكدا وتویەتی، حاڵەتێکی دیکە بە نەخۆشی تای خوێنبەربون لە هەرێمی کوردستان تۆمارکرا، ئەویش پیاوێکی دانشتوی شاری سلێمانی، گەڕەكی چوارچرا، تەمەن 41 ساڵانە.

بەپێی قسەی وەزارەتەكە، ئەو پیاوە لەڕێگای سەربڕینی چەندین ئاژەڵ، بەرکەوتەی ئاژەڵی توشبو بوەو دوای گومانلێکردن بە نەخۆشی تای خوێنبەربون و بونی نیشانەکانی و چەندین ڕێکاری دەستنیشانکردن و چارەسەری پزیشکی گیراوەتەبەر، لە ئێستادا لەژێر چاودێری پزیشکی لە نەخۆشخانە خەوێندراوەو چارەسەر وەردەگرێت و تا ئێستا باری تەندروستی جێگیرە.

بەگوێرەی ئامارەكانی وەزارەتەكە، لەماوەی دو مانگی رابردودا تاوەكو ئێستا تەنیا شەش حاڵەتی توشبون بە تای خوێنبەربون لە هەرێم تۆماركراون كە یەكێكیان لەبەر قورسی باری تەندروستی گیانی لەدەستداوەو حاڵەتەکانی دیکە بەتەواوی چاکبونەتەوە و لە نەخۆشخانە دەرچون.