هاوپەیمانی ئیدارەی دەوڵەت كە لە هێزە شیعی و سوننی و كوردییەكانی پێكهێنەری حكومەتی عێراق پێكدێت، دەڵێت، ئیدانەی دەستدرێژییەكانی ئیسرائیل بۆ سەر ئێران دەكەین و هاوسۆزی خۆیشی بۆ گەلی ئێران دەردەبڕێت.
ئاوێنە: نوسینگەی سەرۆك وەزیرانی عێراق، لە راگەیەندراوێكدا وتی، ئێوارەی ئەمڕۆ دوشەممە، بە ئامادەبونی سەرۆك وەزیران محەمەد شیاع سودانی و مەحمود مەشهەدانی، سەرۆكی پەرلەمانی عێراق، هاوپەیمانی ئیدارەی دەوڵەت كۆبوەتەوەو تاوتوێی پێشهاتەكانی ناوچەكەو لێكەوتەكانی هێرشی ئیسرائیلی بۆ سەر ئێران كردوە.
بەگوێرەی راگەیەندراوەكە، هاوپەیمانی ئیدارەی دەوڵەتی ئیدانەی دەستدرێژییەكانی ئیسرائیلی كردوەو هاوسۆزی خۆی بۆ گەلی ئێران دەربڕیوە كە "روبەڕوی دەستدرێژییەكی ئاشكرا بۆتەوە."
جەختیشی كردۆتەوە لەسەر پێویستی وەگرتنی هەڵوێستێكی یەكگرتو بەرامبەر ئەو دەستدرێژییانەی ئیسرائیل.
هاوپەیمانی ئیدارەی دەوڵەت جەختیشی كردۆتەوە لەسەر رەتكردنەوەی تەواوەتی پێشێلكردنی ئاسمانی عێراق و بەكارهێنانی بۆ دەستدرێژییەكانی ئیسرائیل بۆ سەر ئێران.
هاوپەیمانییەكە هەروەها "پشتیوانی خۆی بۆ هەوڵەكانی حكومەت و رێكارەكانی دەربڕیوە لەدژی بەزاندنی سەروەریی ئاسمانی عێراق لەلایەن قەوارەی زایۆنییەوە و هەروەها پشتیوانی لە جوڵە دیپلۆماسییەكانی حكومەتی عێراق كردوە لەسەر ئاستی هەرێمی و نێودەوڵەتی..ز بۆ رێگریكردن لە فراوانبونی گۆڕەپانی شەڕەكەو هەوڵدان بۆ چەسپاندنی ئاسایش و سەقامگیری."
هاوپەیمانییەكە جەختیشی كردۆتەوە كە پێویستە هەڵوێستی هێزە سیاسییەكان یەكبخرێت لەپێناو بەرگرتن لە كاریگەرییە نەرێنییەكانی دۆخی ناوچەكە لەسەر عێراق.