بنیامین نەتەنیاهۆ، سەرۆک وەزیرانی ئیسرائیل جەخت دەكاتەوە كە  لەدوای هێرشەکەی ئەمڕۆی ئێران بۆسەر کۆمەڵگەی پزیشکیی سۆرۆکا لە باشوری ئیسرائیل، هیچ سەرکردەیەکی ئەو وڵاتە پارێزراو نابێت لە هێرشەکانیان.

ئاوێنە: بنیامین نەتەنیاهۆ، سەرۆک وەزیرانی ئیسرائیل، ئەمڕۆ پێنجشەممە، سەردانی شوێنی هێرشەکەی ئەمڕۆی ئێرانی لە کۆمەڵگەی پزیشکیی سۆرۆکا كردو لەبارەی ئەگەری هێرشکردنە سەر عەلی خامنەیی، رێبەری کۆماری ئیسلامیی ئێران، وتی،  "کەس پارێزراو نابێت و هەمو بژاردەکان کراوەن."

وتیشی"باشتر وایە لە راگەیاندنەکاندا قسە لەسەر ئەمە نەکرێت."

 سەرۆك وەزیرانی ئیسرائیل جەختی کردەوە، ئیسرائیل توانای هەیە ئەگەر پێویست بکات بە تەنیا تەواوی ئەرکی روبەڕوبونەوەی ئێران جێبەجێ بکات و وتیشی"لە کۆتایی ئەم ئۆپەراسیۆنەدا، نابێت هیچ هەڕەشەیەکی ئەتۆمی و موشەکی بالیستی لەسەر ئیسرائیل بمێنێت."

 نەتەنیاهۆ لەبارەی بەشداریكردنی ئەمریكا لە شەڕەكەدا وتی" "بەشداریکردنی ئەمریکا لە جەنگەکەدا بڕیاری سەرۆک ترەمپە، ئەو کارێک دەکات کە بۆ ئەمریکا باش بێت. منیش کارێک دەکەم بۆ ئیسرائیل باش بێت. ئەو شارەزای گەمەکەیە."

بەقسەی نەتەنیاهۆ، تەواوی گەلی ئیسرائیل لەم جەنگەدا باج دەدەن و وتیشی "باجی کەسی هەیە، خەڵک بریندار بون و خێزانەکان ئازیزانیان لەدەستداوە. ئەمە خێزانی منیشی گرتوتەوە و ئەمە دوەمجارە کە بێنی ئەڤنەری کوڕم بەهۆی هەڕەشەی موشەکییەوە ئاهەنگی هاوسەرگیرییەکەی هەڵدەوەشێنێتەوە. ئەمە باجێکی کەسییە بۆ دەستگیرانەکەشی، دەبێت بڵێم کە هاوسەرە ئازیزەکەم پاڵەوانێکە، ئەویش باجێکی کەسی دەدات."