كارۆلاین لیڤیت، وتەبێژی كۆشكی سپی رایگەیاند، ترەمپ پێی وایە دەرفەتێكی گەورە بۆ دانوستان لەگەڵ ئێران لە ئارادایە، بۆیە لەماوەی دو هەفتەی داهاتودا بڕیاری خۆی لەبارەی بەشداریكردن لە شەڕ دژی ئێران دەدات.
ئاوێنە: كارۆلاین لیڤیت، وتەبێژی كۆشكی سپی، ئەمڕۆ پێنجشەممە، لە كۆنگرەیەكی رۆژنامەوانیدا لەبارەی ئەوەی كە ئایا ئەمریكا بەشێوەیەكی راستەوخۆ دەچێتە نێو شەڕەكەی نێوان ئیسرائیل و ئێرانەوە، ئاشكرایكرد، سەرۆك ترەمپ وتویەتی، لەسەر بنەمای بونی دەرفەتێكی گەورە بۆ ئەنجامدانی دانوستان لەگەڵ ئێران كە دەكرێت لە ئایندەیەكی نزیكدا بكرێت یان نەكرێت، بڕیاری خۆی لەبارەی بەشداریكردن لەماوەی دو هەفتەی داهاتودا دەدات.
لەبارەی ئەو پەیامەی كە لایەنگرانی ئاسایی ترەمپ بۆ سەرۆكی ئەمریكایان ناردوەو تێیدا نیگەرانی خۆیان لە پەیوەست بە بەشداریكردنی ئەمریكا لە جەنگەكەدا دەربڕیوە، كارۆلاین لیڤیت وتی، "متمانەتان بە سەرۆك ترەمپ هەبێت."
جەختیشی كردەوە كە ترەمپ لە خولی یەكەمی سەرۆكایەتی خۆیدا پارێزگاری لە ئاسایشی جیهان كرد لە رێگەی "ئاشتی بە بەكارهێنانی هێز".
هەروەها ئاماژەی بەوەشدا كە دەستپێشخەرییەكان لەگەڵ ئێران بەردەوامن، بەڵام ئەوەی رون نەكردەوە كە هۆكاری ئەوە چییە ترەمپ پێی وایە "دەرفەتێكی گەورە" هەیە بۆ دانوستان.
هەروەها كاتێك پرسیاری لەبارەی هەڵوێستی ئیدارەی ئەمریكاوە لێكرا لەسەر گۆڕینی رژێم لە ئێران، لیڤیت وتی، ئەولەویەتی یەكەمی سەرۆك گەرەنتیكردنی ئەوەیە كە ئێران سەركەوتو نەبێت لە دروستكردنی چەكی ئەتۆمی.