رێكخراوی مافی مرۆڤی هەنگاو رایگەیاند، سوپای پاسدارانی ئێران داوای چۆڵكردنی سێ گەڕەكی شاری سەردەشتی رۆژهەڵاتی كوردستانی كردوە.
ئاوێنە: رێكخراوی مافی مرۆڤی هەنگاو، ئەمڕۆ پێنجشەممە، لە راگەیەندراوێكدا وتویەتی، سوپای پاسدارانی كۆماری ئیسلامیی ئێران بە دانیشتوانی هەر سێ گەڕەکی "ئاشان، گردەسور و نێزەڕۆی”ی شاری سەردەشت هۆشداری داوە كە دەبێ بە زوترین كات شوێنی مانەوەیان چۆڵ بكەن.
بەرلەوەش هەنگاو رایگەیاندبو، هێزەكانی وەزارەتی ئیتلاعات، سوپای پاسداران و هێزە ئەمنییەكانی دیكە لە بینا پەروەردەییەكان و قوتابخانەكانی شاری سەردەشت جێگیر كراون.
ئاماژەی بەوەشدابو، لەگەڵ زۆربونی تێکهەڵچونەکان، بنەماڵەكانی سەر بە هێزە سەربازی و حكومییەكانی سەردەشت، شاریان چۆڵ كردوە.
هەنگاو لەسەر بنەمای زانیارییە بەدەسهاتوەكانی هێمای بۆ ئەوەش كردبو كە خوێندگەی سەرەتایی "كەوسەر"ی كچان لەم رۆژانەی دواییدا بەتەواوەتی كراوەتە شوێنی جێگیركردنی هێزە ئەمنییەكان.
هەنگاو ئاماژەی بەوەداوە كە ئەوەش بە ئاشكرا بەكارهێنانی خەڵكە وەك قەڵغانی مرۆیی و پێشێلكردنێكی ئاشكرای مافی خەڵكانی مەدەنییە.