دەیڤید لامی، وەزیری دەرەوەی بەریتانیا دوای گفتوگۆکانی لە کۆشکی سپی لەگەڵ مارکۆ روبیۆ، وەزیری دەرەوەی ئەمریکا، رایگەیاند، پەنجەرەیەك بۆ دیپلۆماسی بۆ دو هەفتە كراوەتەوە.

ئاوێنە: دەیڤید لامی، وەزیری دەرەوەی بەریتانیا، رۆژی پێنجشەممە، لە واشنتن لەگەڵ ماركۆ روبیۆ، وەزیری دەرەوەی ئەمریكاو ستیڤ ویتکۆف، نێردەی تایبەتی ئەمریکا، کۆبوەوە و بەپێی میدیای بەریتانیا، دوای كۆبونەوەكەی لە واشنتۆن، وەزیرە بەریتانییەكە راستەوخۆ بەرەو جنێڤ بەڕێكەوتوە بۆ ئەوەی ئەمرۆ هەینی، لەگەڵ هاوتا ئەڵمانی و فەرەنسییەكەیدا لەگەڵ عەباس عێراقچی، وەزیری دەرەوەی ئێران گفتوگۆ لەبارەی بەرنامە ئەتۆمییەكەی ئەو وڵاتە بكەن.

وەزیری دەرەوەی بەریتانیاو وەزیری دەرەوەی ئەمریكا لە راگەیەندراوێكی هاوبەشدا جەختیان كردەوە كە ئێران نابێت ببێتە خاوەنی چەكی ئەتۆمی.

هێشتا دیار نییە كە ئایا وەزیرە بەریتانییەكە لەدوای دیدارەكەی لەگەڵ وەزیری دەرەوەی ئەمریكاو ستیڤ ویتكۆف، نوێنەری تایبەتی ئەمریكا، پەیامی راستەوخۆی لە واشنتۆنەوە بۆ عەباس عراقچی، وەزیری دەرەوەی ئێران پێیە یان نا.

لامی بە ئاماژەدان بە قسەكانی سەرۆكی ئەمریكا كە ئاماژەی بەوەدابو، لەماوەی دو هەفتەی ئایندەدا بڕیار لەبارەی بەشداریكردنی ئەمریكا لە هێرشكردن یان هێرش نەكردنە سەر ئێران دەدات، وتی، ئێستا پەنجەرەیەك بۆ دیپلۆماسی بۆ دو هەفتە كراوەتەوە.