عەباس عراقچی، وەزیری دەرەوەی ئێران رایگەیاند، ئەمریكییەكان چەند جارێك پەیامیان بۆ ناردون بەڵام رەتیدەكاتەوە هیچ گفتوگۆ یان پەیوەندییەكی تەلەفۆنیان لەگەڵیان هەبوبێت. دەشڵێت، لەبارەی بەرنامە موشەكییەكەمان گفتوگۆ لەگەڵ هیچ كەسێك ناكەین.

ئاوێنە: عەباس عراقچی، وەزیری دەرەوەی ئێران، ئەمڕۆ هەینی، لە لێدوانێكدا بۆ میدیای رەسمی وڵاتەكەی، رایگەیاند، ئەمریكییەكان لەماوەی جەنگدا چەند جارێك پەیامیان بۆ ناردون.

وتیشی، ئێمە بە راشكاوی وتومانە تا ئەو كاتەی هێرشەكانی ئیسرائیل رانەگیرێن، هیچ گفتوگۆیە مانای نییە.

وتیشی، ئێمە لەگەڵ ئەمریكییەكان وەك شەریكی ئیسرائیل لەم جەنگەدا، هیچ قسەیەكمان نییە.

جەختیشی كردۆتەوە، ئێمە هیچ پەیوەندییەكی تەلەفۆنی و گفتوگۆیەكمان لەگەڵ ئەمریكییەكان نەبوە و ئەو هەواڵانەی لەمبارەیەوە بڵاوكراونەتەوە راست نین.

جەختیشی كردەوە كە لەبارەی بەرنامە موشەكییەكەیان لەگەڵ هیچ كەسێك گفتوگۆ ناكەن.

وتوشیەتی، بەشێك لە وڵاتان پەیوەندییان كردوە

ئاماژەی بەوەشدا، داخوازی بۆ راگرتنی شەڕەكە ئێستا دەستی پێكردوەو زیاتریش دەبێت.