ئا: ئاوێنە

دەزگای دژە تیرۆرو لایەنە ئەمنییەكانی سلێمانی دەڵێن"تاوانە خۆكوژییەكەی رۆژنامەنوس ئامانج بابانی و لانە محەمەدی خێزانی و منداڵەكەیان چەندە روداوێكی ناخهەژێن بو بۆ هێزە ئەمنییەكانی سلێمانی، ئەوەندەش بەلارێدابردنی ئەم روداوە بۆ لەكەداركردنی رۆڵەكانی دژەتیرۆر و سەرجەم هێزە ئەمنییەكانی سلێمانی، كارێكی قێزەون بو."

دەزگای دژە تیرۆرو لایەنە ئەمنییەكانی سلێمانی، ئەمڕۆ پێنجشەممە، رونكردنەوەیەكیان لەبارەی روداوی كوژرانی هەردو رۆژنامەنوس ئامانج بابانی و لانە محمەد و منداڵەكەیان بڵاوكردەوە و دەڵین" تاوانە خۆكوژییەكەی رۆژنامەنوس ئامانج بابانی و لانە محەمەدی خێزانی و منداڵەكەیان چەندە روداوێكی ناخهەژێن بو بۆ هێزە ئەمنییەكانی سلێمانی، ئەوەندەش بەلارێدابردنی ئەم روداوە بۆ لەكەداركردنی رۆڵەكانی دژەتیرۆر و سەرجەم هێزە ئەمنییەكانی سلێمانی، كارێكی قێزەون بو، كە حكومەت و پەرلەمان و ژمارەیەك رۆژنامەنوس و میدیاو راگەیاندنی كوردی پێش لێكۆڵینەوە لەڕوداوەكەو دەرخستەی ئەنجامەكانی ئەم كارە خۆكوژییە، كە خۆی لە خۆیدا تاوانێكە و كەمن ئەو كەسانەی پەنای بۆدەبەن."

هەروەها لە رونكردنەوەكەدا هاتوە" ژمارەیەك بەرپرسی حكومی و پەرلەمان و دامەزراوەی میدیایی و راگەیاندنی سێبەری لایەنێكی هەرێم، لەسەروبەندی بڵاوبونەوەی هەواڵەكەدا بەبێ‌ زانیاری و بەڵگە تەواوی دەزگا شەرعییەكانی ئەمنی سلێمانیان كردە ئامانج و وشەی تیرۆریان نوساند بە روداوەكەوە، هەر بەوەشەوە ئەم تۆمەتە نەوەستاو بگرە بكەری ئەو تاوانە ناخهەژێنەشیان خستە پاڵ پارێزەرانی ئەمنی و ئاسایشی سلێمانی."

دەقی ڕونكردنەوەكە...

رونكردنەوەیەك بۆ ڕای گشتی

تاوانە خۆكوژییەكەی رۆژنامەنوس ئامانج بابانی و لانە محەمەدی خێزانی و منداڵەكەیان چەندە روداوێكی ناخهەژێن بو بۆ هێزە ئەمنییەكانی سلێمانی، ئەوەندەش بەلارێدابردنی ئەم روداوە بۆ لەكەداركردنی رۆڵەكانی دژەتیرۆر و سەرجەم هێزە ئەمنییەكانی سلێمانی، كارێكی قێزەون بو، كە حكومەت و پەرلەمان و ژمارەیەك رۆژنامەنوس و میدیاو راگەیاندنی كوردی پێش لێكۆڵینەوە لەڕوداوەكەو دەرخستەی ئەنجامەكانی ئەم كارە خۆكوژییە، كە خۆی لە خۆیدا تاوانێكە و كەمن ئەو كەسانەی پەنای بۆدەبەن.

بەڵام مەخابن ژمارەیەك بەرپرسی حكومی و پەرلەمان و دامەزراوەی میدیایی و راگەیاندنی سێبەری لایەنێكی هەرێم، لەسەروبەندی بڵاوبونەوەی هەواڵەكەدا بەبێ‌ زانیاری و بەڵگە تەواوی دەزگا شەرعییەكانی ئەمنی سلێمانیان كردە ئامانج و وشەی تیرۆریان نوساند بە روداوەكەوە، هەر بەوەشەوە ئەم تۆمەتە نەوەستاو بگرە بكەری ئەو تاوانە ناخهەژێنەشیان خستە پاڵ پارێزەرانی ئەمنی و ئاسایشی سلێمانی.

دەمانەوێت لەم رونكردنەوەیەدا ئەو ڕاستییە بۆ هەمو لایەك شیبكەینەوە، كە وشەی تیرۆر وێناكردن بە روداوێكی خۆكوژی، تروپكی نەزانی و نەشارەزایی ئەو كەس و لایەن و راگەیاندنانە نیشاندەدات، كە بێ‌ گەڕانەوە بۆ لایەنە پەیوەندیدارەكانی تایبەت بە لێكۆڵینەوە لەڕوداوەكە دەستبەجێ ژمارەیەك لێدوانی نابەرپرسانەیان لە میدیاكان و تۆڕەكۆمەڵایەتییەكان بڵاوكردەوە، ئەمەش بەمەبەستی گۆڕینی كەیسی ئامانج بابانی بۆ بابەتێكی سیاسی و كردەوەیەكی تیرۆرستی، هەر بۆیە دەڵێین: ئەم ڕەفتارە نەك ژەهرێكی كوشندە بو، بەڵكو ئەو هەڵمەتە چەواشەكارییە لەسەر بەلارێدابردنی روداوەكە، جۆرێك بو لەپیلان بۆ تێكدانی دۆخی ئاسایشی سلێمانی و لاواز نیشاندانی بەرپرسانی ئەمنی شارەكە.

بەڵام سەرەنجام پاش چەند سەعاتێك لە ڵێكۆڵینەوە سەرەتاییەكان، بۆ هەمو لایەك رونبۆوە ، كە ئەو ڕوداوەی ئامانج بابانی و لانە محەمەد و منداڵەكەیان، كە تێیدا گیانیان لەدەستدا، لە دورو نزیكەوە پەیوەندی بە كردەوەی تیرۆرستییەوە نییە و بابەتەكە كۆمەڵایەتییە و كردەوەكەش خۆكوژی بوە، هەمو بەڵگەكانیش لەسەر روداوەكە ئەوە نیشاندەدەن، ئامانج بابانی كۆتایی بە ژیانی خێزان و منداڵەكەی پاشان خۆی هێناوە.

ئەوەی ماوەتەوە لەم رونكردنەوەیەدا بۆ ڕای گشتی بخەینە ڕو، داواكارییە لەهەمو ئەو كەس و لایەن و دامەزراوە میدیایی و بەپرسە حكومییانەی، كە تۆمەتیان خستە پاڵ پارێزەرانی خاك و ئارامی شاری سلێمانی، لێرەوە پێیان دەڵێین: وانەیەك لەم ڕوداوە فێربن و داوای لێبوردرنیش بكەن و بە هەستی بەرپرسیارێتیشەوە لە ڕوداوەكان بڕوانن، نەك ببنە لایەنێك بۆ تەمومژاویكردنی كۆی ئەو ڕوداوانەی كە لەهەمو كۆمەڵگایەكی جیهاندا رۆژانە ئەگەری رودانیان هەیە.

لەكۆتایشدا خوازیارین كۆمەڵگاكەمان لەم روداوە ناخ هەژێنانە دوربێت و خوای گەورەش سەبوری هەردو بنەماڵەی كاك ئامانج و لانەخان بدات و بە سۆزی خۆشی لەم خێزانە خۆشبێت.

دەزگای دژە تیرۆر و لایەنە ئەمنییەكانی سلێمانی