ئیسرائیل هەڕەشەکانی بۆ سەر ئێران نوێکردەوە لە کاتێکدا ئاڵوگۆڕی پێشنیازەکان لە نێوان تاران و واشنتن لە ڕێگەی نێوەندگیرێکی پاکستانییەوە بەردەوامە. بنیامین ناتانیاهۆ، سەرۆک وەزیرانی ئیسرائیل جەختی لەوە کردەوە کە فڕۆکەوانەکانی وڵاتەکەی دەتوانن بگەنە هەر شوێنێکی ئاسمانی ئێران.
ئاوێنە: هەروەها ناتانیاهۆ لە لێدوانەکانیدا ئەمڕۆ یەکشەممە جەختی لەوە کردەوە کە فڕۆکەوانەکانی "لە کاتی پێویستدا لەوپەڕی ئامادەییدان بۆ ئەو کارە".
لەم بارەیەوە جەختی لەوە کردەوە کە ئیسرائیل لە هەر کاتێکی تر بەهێزتر بووە، و ئاماژەی بەوەشدا "پێویستە هەمیشە زۆر لە دوژمنەکانی بەهێزتر بمێنێتەوە".
ڕایگەیاند کە حکومەتی ئیسرائیل دوو پۆل (سرب) فڕۆکەی مۆدێرنی جۆری ئێف-٣٥ و ئێف-١٥ی کڕیوە، و ئاماژەی بەوەشدا کە ئەم فڕۆکانە باڵادەستییە ئاسمانییە ڕەهاکەی ئیسرائیل زیاتر دەکەن. هەروەها پێی وابوو کە هێزی ئاسمانی لە ئۆپەراسیۆنەکەی پێشوودا دژی ئێران و لەم دواییانەشدا باڵادەستی خۆی سەلماندووە.
ئەمە لە دوای ئەوە دێت کە پێشتر لەمڕۆدا وەزارەتی بەرگری ئیسرائیل ڕایگەیاند کە سوپا دوو پۆلی نوێ لە فڕۆکەی جەنگی دەکڕێت، ئەمەش دوای ڕەزامەندی لیژنەی وەزاری ئیسرائیل بۆ کاروباری کڕین. وەزارەتەکە لە بەیاننامەیەکدا ڕایگەیاند کە ئیسرائیل لە یەک کاتدا دوو پۆلی نوێی فڕۆکەی جەنگی دەکڕێت کە پێکدێن لە پۆلی چوارەمی فڕۆکەکانی "ئێف-٣٥" لە کۆمپانیای لۆکهید مارتن، و پۆلی دووەمی فڕۆکەکانی "ئێف-١٥ ئای ئەی" لە کۆمپانیای بۆینگ، ئەمەش بەپێی ئاژانسی (DPA).
هەروەها ڕوونیکردەوە کە بەهای ئەم گرێبەستانە دەگاتە دەیان ملیار شیکڵ، و تێکەڵکردنی تەواوەتی فڕۆکەکان لەناو هێزی ئاسمانی ئیسرائیل دەگرێتەوە، لەگەڵ خزمەتگوزاری چاککردنەوەی گشتگیر، پارچەی یەدەگ و پشتیوانی لۆجیستی. و پێی وابوو کە "ئەم دوو پۆلە نوێیە دەبنە کۆڵەکەیەکی سەرەکی لە پەرەپێدانی تواناکانی سوپای ئیسرائیل بۆ مەودای درێژخایەن، بۆ ڕووبەڕووبوونەوەی هەڕەشە گۆڕاوەکانی ناوچەکە و پاراستنی باڵادەستییە ئاسمانییە ستراتیژییەکە".
ئەمەش هەنگاوی یەکەمە لە جێبەجێکردنی پلانی سوپای ئیسرائیل بۆ بەهێزکردنی تواناکانی لە ماوەی دەیەیەکدا، کە لەلایەن ناتانیاهۆ و یسرائیل کاتس، وەزیری بەرگرییەوە پەسەندکراوە لە چوارچێوەی بودجەیەکی تەرخانکراو کە دەگاتە ٣٥٠ ملیار شیکڵ.