سکرتێری گشتیی حزبی دیموکراتی کوردستانی ئێران ڕایدەگەیەنێت مەرجی سەرەکییان بۆ هاوپەیمانی لەگەڵ ئۆپۆزسیۆن ناسینی مافی نەتەوەکان و کۆتاییهێنانە بە دەسەڵاتی ناوەندی؛ جەختیش دەکاتەوە ستراتیژی ئەوان ڕووخانی تەواوەتیی دەسەڵاتە نەک تەنیا لاوازکردنی وەک ئەوەی ڕۆژئاوا دەیەوێت.
ئاوێنە: مستەفا هیجری، لێپرسراوی گشتیی حزبی دیموکراتی کوردستانی ئێران (حدکا) ڕایگەیاند، پڕۆسەی داڕشتنی نەخشەڕێگای ئێرانی داهاتوو لەسەر بنەمای "دیموکراسی و نامەرکەزییەت" دەبێت پێش هەر گۆڕانکاری و ڕووخانێکی کۆماری ئیسلامی یەکلایی بکرێتەوە، نەک دوابخرێت بۆ قۆناغی دوای ڕژێم.
مەرجەکانی هاوپەیمانی و هێڵی سووری "ناوەندگەرایی"
لە چاوپێکەوتنێکدا لەگەڵ پلاتفۆرمی "حەل نێت"، هیجری باسی لەوە کرد کە سەرەڕای ئەوەی ڕژێمی تاران لە قۆناغی لێواری داڕماندایە، بەڵام توانای سەرکوتکاری وایکردووە وادەی کۆتاییهاتنی نادیار بێت. ناوبراو ئاماژەی بەوە دا درێژەکێشانی ئەم دۆخە، سەرەڕای باجە مرۆییەکانی، دەرفەتێک دەداتە هێزە نەیارەکان تا لەسەر داهاتووی سیاسیی وڵاتەکە بگەنە سازانێکی نیشتمانی.
سەبارەت بە بەرەی ئۆپۆزسیۆن، سکرتێری گشتیی حدکا ئاشکرای کرد کە لە گفتوگۆدان لەگەڵ نوێنەرانی پێکهاتە نەتەوەییەکانی وەک عەرەب، بەلووچ، تورک و تورکمان، لەپاڵ هەندێک لایەنی سیاسیی فارس. لە هەمان کاتدا هێڵی سووری حزبەکەی دەستنیشان کرد و جەختی کردەوە بە هیچ شێوەیەک ناچنە ناو هاوپەیمانی لەگەڵ ئەو هێزانەی هەوڵی زیندووکردنەوەی مۆدێلی "حکومەتی ناوەندیی دەسەڵاتخواز" دەدەن.
ستراتیژی کورد لە بەرامبەر ئەجێندای ڕۆژئاوا
لە تەوەرێکی دیکەدا، هیجری تیشکی خستە سەر جیاوازیی قووڵی نێوان دیدگای ئۆپۆزسیۆنی کورد و ئەجێندای نێودەوڵەتی؛ ڕوونی کردەوە کە وڵاتانی ڕۆژئاوا و ئیسرائیل تەنیا بەدوای "لاوازکردن و کۆنترۆڵکردنی" دەسەڵاتی تاراندان، لە کاتێکدا ئامانجی حزبی دیموکرات و ئازادیخوازان "ڕووخانی بنبەستییانە" و بونیادنانی دەسەڵاتێکی دیموکراسیی نامەرکەزییە. ناوبراو هۆشداری دا کە فەرامۆشکردنی مافی نەتەوەکان لە ئێستادا، زەمینە بۆ لەدایکبوونەوەی دیکتاتۆرییەکی نوێ خۆش دەکات.
پەیوەست بە دۆخی ناوخۆیی و گرژییەکانی باکووری ڕۆژئاوای ئێرانیش، داوای لە نەتەوەی کورد و ئازەری کرد لە ڕوانگەی شۆفێنی دووربکەونەوە و بەرەو پێکەوەژیانی ئاشتییانە و چارەسەری سیاسی هەنگاو بنێن.
ململانێی هەرێمی و گرژییە مەیدانییەکان
ئەم هەڵوێستانە هاوکاتە لەگەڵ ئاڵۆزییە سەربازییەکانی نێوان تاران و بەرەی (ئەمریکا-ئیسرائیل). حدکا بەرپرسیارێتی تێکچوونی ئاسایشی ناوچەکە دەخاتە ئەستۆی کۆماری ئیسلامی، هاوکات دووپاتی دەکاتەوە کە بۆ پاراستنی بەرژەوەندی و سەقامگیریی هەرێمی کوردستانی عێراق، هێرشی چەکداری لە سنوورەکانەوە ڕاگرتووە و گرەو لەسەر فراوانکردنی ناڕەزایەتییە مەدەنییەکان و هاندانی هێزە ئەمنییەکانی ناوخۆ بۆ جیابوونەوە لە دەسەڵات دەکات.
لە بەرامبەردا، تاران لە ماوەی ڕابردوودا بە دەیان هێرشی مووشەکی و فڕۆکەی بێفڕۆکەوان بارەگا و کەمپەکانی ئەو حزبەی لە خاکی هەرێم بۆردومان کردووە و گوشارە دیپلۆماسی و ئەمنییەکانی لەسەر بەغدا و هەولێر چڕکردووەتەوە بۆ چەککردنی ئەم لایەنانە، بە پاساوی هەماهەنگییان لەگەڵ دەزگا هەواڵگرییە بیانییەکان.