عەباس عەراقچی، وەزیری دەرەوەی ئێران، ڕۆژی چوارشەممە ڕایگەیاند کە ئێران جگە لە ڕێککەوتنێکی دادپەروەرانە و گشتگیر، هیچ شتێکی تر قبوڵ ناکات.
ئاوێنە: لێدوانەکانی عەراقچی لە میانی کۆبوونەوەیدا لەگەڵ هاوتا چینییەکەی هات، کە تێیدا جەختی لەوە کردەوە پەکین دۆستێکی نزیکە و هاریکاریی دووقۆڵیش "لە ژێر سایەی هەلومەرجی ئێستادا بەهێزتر دەبێت".
لە لای خۆیەوە، وانگ یی، وەزیری دەرەوەی چین ڕایگەیاند کە پەکین ئامادەیە بۆ بەردەوامیدان بە هەوڵەکانی لەپێناو کەمکردنەوەی گرژییەکان، هاوکات جەختیشی لەوە کردەوە کە کۆبوونەوەی ڕاستەوخۆی نێوان واشنتن و تاران زۆر پێویستە، بەو پێیەی ناوچەکە بە قۆناغێکی چارەنووسسازدا تێدەپەڕێت.
بەگوێرەی ئاژانسی هەواڵی چینی نوێ "شینخوا"، بەیانی ڕۆژی چوارشەممە وەزیری دەرەوەی چین لە پەکین چاوی بە هاوتا ئێرانییەکەی کەوتووە، بێ ئەوەی زانیاری زیاتر لەو بارەیەوە بخاتە ڕوو.
ئەم سەردانە بە یەکەمین سەردانی عەراقچی بۆ چین هەژمار دەکرێت لە دوای هەڵگیرسانی جەنگی نێوان ئێران لە لایەک و ویلایەتە یەکگرتووەکانی ئەمریکا و ئیسرائیل لە لایەکی ترەوە لە ٢٨ی شوباتی ڕابردوودا.
چین وەک هاوردەکارێکی سەرەکیی نەوتی ئێران دادەنرێت، بەمەش ڕووبەڕووی ئەو سزایانە دەبێتەوە کە ئەمریکا سەپاندوونی، ئەمەش لە کاتێکدایە کە واشنتن هەوڵی خنکاندنی سەرچاوەکانی داهاتی تاران دەدات.
ئەم گەشتە کە تەنیا یەک ڕۆژ دەخایەنێت، پێش سەردانە چاوەڕوانکراوەکەی دۆناڵد ترەمپ، سەرۆکی ئەمریکا بۆ چین دێت کە بڕیارە لە ١٤ و ١٥ی ئایاردا ئەنجام بدرێت.
پێشتر مارکۆ ڕوبیۆ، وەزیری دەرەوەی ئەمریکا هانی چینی دابوو بۆ ئەوەی فشار بخاتە سەر وەزیری دەرەوەی ئێران، و ڕایگەیاندبوو: "هیوادارم چینییەکان بە (عەراقچی) بڵێن ئەوەی پێویستە پێی بوترێت، ئەویش ئەوەیە کە ئەوەی لە گەرووەکاندا دەیکەن دەبێتە هۆی گۆشەگیرکردنتان لەسەر ئاستی جیهان".
لە کاتێکدا پەکین بە شێوەیەکی گشتی پارێزگاری لە هەڵوێستێکی بێلایەنانە سەبارەت بە ململانێکان دەکات، بەڵام دژایەتیی کردەئامانجگرتنی سەروەریی خاکی ئێرانی کردووە و کارئاسانیشی بۆ هەوڵەکانی نێوەندگیری کردووە. هەروەها چین چەندین جار داوای لە ئەمریکا و ئێران کردووە کە پارێزگاری لە ئاگربەست بکەن و کۆتوبەندەکانی سەر گەرووی هورمز هەڵبگرن.