مەسعود پزیشکیان، سەرۆک کۆماری ئێران، ڕۆژی پێنجشەممە ڕایگەیاند کە بەم دواییانە بەشداری لە کۆبوونەوەیەکی دوو کاتژمێر و نیویدا کردووە لەگەڵ موجتەبا خامنەیی، ڕێبەری باڵا، ئەمەش دوای ئەو لێدوان و دەنگۆیانە دێت کە باس لە تەندروستی ڕێبەری باڵا و برینداربوونی دەکەن لە هێرشەکانی ئەمریکا و ئیسرائیل بۆ سەر ئێران.
ئاوێنە: پزیشکیان کاتی کۆبوونەوەکەی دیاری نەکرد و وتی: "ئەوەی لەم دیدارەدا زۆرترین سەرنجی ڕاکێشام، دیدگای ڕێبەری باڵای شۆڕشی ئیسلامی و شێوازە سادە و ڕاستگۆیانەکەی بوو".
هەروەها وتیشی: "شێوازی ڕێبەری باڵا لە کۆبوونەوەی ئەم دواییەماندا، کەشی گفتوگۆکەی گۆڕی بۆ ژینگەیەکی بنیاتنراو لەسەر متمانە و گفتوگۆی ڕاستەوخۆی بێ بەربەست".
پزیشکیان - لە لێدوانەکانیدا کە میدیا فەرمییەکانی ئێران گواستوویانەتەوە - ئاماژەی بەوە کرد کە تاران ڕووبەڕووی "گوشاری دەرەکی بووەتەوە کە ئامانج لێی زیادکردنی گوشاری ئابووری، تێکدانی سەقامگیریی ناوخۆیی و لاوازکردنی یەکڕیزیی نیشتمانییە"، وەک ئەوەی خۆی وەسفی کردووە.
سەرۆک کۆماری ئێران وتی: "ئامانجی دوژمن لەم گوشارانە، دروستکردنی دۆخێکی ناڕەزایەتیی گشتی، هاندانی خەڵک بۆ هاتنە سەر شەقامەکان و لاوازکردنی پێکهاتەی دەسەڵاتە".
پزیشکیان سەرزەنشتی ئەمریکای کرد و وتی: "بەرپرسانی ئەمریکا بە ئاشکرا باس لە توندکردنەوەی گوشاری ئابووری بۆ سەر گەلەکەمان دەکەن بە ئامانجی دروستکردنی ناڕەزایەتی".
هەروەها وتیشی: "گەل پیلانی دوژمنانی پووچەڵ کردووەتەوە سەرەڕای هەلومەرجی شەڕ و ئەو گوشارە ئابوورییانەی کە بەرگەیان دەگرن".
لە مێژە بەرپرسانی ئەمریکا گومانیان لە باری تەندروستیی ڕێبەری نوێی ئێران هەبووە، کە لەوەتەی وەک جێنشینی باوکی هەڵبژێردراوە بە ئاشکرا دەرنەکەوتووە، کە باوکی لە سەرەتای دەستپێکردنی شەڕی ئەمریکا و ئیسرائیل بۆ سەر ئێران لە ٢٨ی شوباتدا تیرۆرکرا.
دۆناڵد ترەمپ، سەرۆکی ئەمریکا و بەرپرسانی دیکە زیاتر لە جارێک ڕایانگەیاندووە کە کەلێن و درز لە ناو پێکهاتەی دەسەڵاتی ئێراندا هەیە، ئەمەش بەهۆی دوورکەوتنەوەی کرداریی ڕێبەری باڵا لە بازنەی بڕیاردان بەهۆی باری تەندروستییەوە.