مارکۆ ڕوبیۆ، وەزیری دەرەوەی ئەمریکا جەختی لەوە کردەوە کە ئەمڕۆ هەینی ویلایەتە یەکگرتووەکان چاوەڕێی وەرگرتنی وەڵامێکە لە تارانەوە، و هیوای خواست کە وەڵامەکە "پێشنیازێکی جدی" لەخۆبگرێت، لە هەمان کاتدا جەختی لەوە کردەوە کە بەدەستهێنانی چەکی ئەتۆمی لەلایەن ئێرانەوە "کارێکی قبووڵنەکراوە".
ڕوبیۆ لە لێدوانێکیدا بۆ ڕۆژنامەنووسان دوای دیدارەکەی لەگەڵ پاپای ڤاتیکان (لیۆی چواردەیەم)، ڕوونیکردەوە کە لەگەڵ پاپا گفتوگۆی لەبارەی دۆخی ئێران و ئەو "مەترسییانە" کردووە کە ڕژێمەکە لەوێ دروستی دەکات، و ئاماژەی بەوەشکرد کە هەڵوێستی سەرۆک دۆناڵد ترەمپ ڕوونە لەسەر پێویستیی مامەڵەکردن لەگەڵ هەڕەشەکانی ئێران، هەروەها هەوڵەکانی تارانی بۆ کۆنترۆڵکردنی گەرووی هورمز بە "قبووڵنەکراو" وەسف کرد.
سەبارەت بە پەرەسەندنە سەربازییەکان، وەزیری دەرەوەی ئەمریکا ئاماژەی بە وەڵامدانەوەی هەر بەئامانجگرتنێک کرد کە ڕووبەڕووی ویلایەتە یەکگرتووەکان دەبێتەوە، و گوتی: "ئەگەر تەقەکردن لەگەڵ ئێران نەگاتە کۆتایی، ئەوا ئێمەش بە تەقەکردن وەڵام دەدەینەوە"، و تیشکی خستە سەر ئەوەی کە هێرشەکانی ڕۆژی پێنجشەممەی ڕابردوو جیاواز بوون لە ئۆپەراسیۆنی "تووڕەیی داستانی".
ئێوارەی ڕۆژی پێنجشەممە ئێران ڕایگەیاند کە ئاڵوگۆڕی تەقە لە نێوان هێزەکانی ئێران و هێزەکانی ئەمریکادا ڕوویداوە، دوای ئەوەی کە ناوی لێنا "دەستدرێژی" ئەمریکا بۆ سەر تانکەرێکی نەوتی ئێرانی لە گەرووی هورمز.
لای خۆیەوە وەزارەتی دەرەوەی ئێران ڕایگەیاند کە ئەوەی شەوی ڕابردوو ڕوویدا پێشێلکارییەکی زەقی یاسای نێودەوڵەتی و شکاندنی ئاگربەست بووە، و ئاماژەی بەوەشکرد: "ئەگەر پێویست بکات بە توندی وەڵامی هەر دەستدرێژی و سەرکێشییەکی نوێ دەدەینەوە."
لەسەر پرسی لوبنانیش، ڕوبیۆ جەختی لەوە کردەوە کە واشنتن بەهێزکردنی حکومەتی شەرعی لە لوبنان وەک کارێکی لەپێشینە دادەنێت، و حزبوڵڵاشی وەک "کۆسپێک" لە بەردەم بەدیهێنانی ئەو ئامانجە دانا.
هەروەها گوتیشی کە ئەو حزبەی "ئەگەر پاڵپشتی ئێران نەبوایە بوونی نەدەبوو" لاواز کراوە، بەڵام هێشتاش توانای زیانگەیاندنی ماوە.
وەزیرە ئەمریکییەکە باسی لەوە کرد کە حزبوڵڵا نەک تەنها ئیسرائیل، بەڵکو لوبنانیش دەکاتە ئامانج، و داوای کرد کە پێویستە سەرچاوەکانی داراییەکەی ببڕدرێت و پاڵپشتی لە دامەزراوەکانی دەوڵەتی لوبنانی بکرێت.
هەروەها ڕوبیۆ ڕێگەی لە بەردەم هەر گفتوگۆیەک و دانوستانێکی ڕاستەوخۆ لەگەڵ حزبەکە گرت، و جەختی لەوە کردەوە کە ویلایەتە یەکگرتووەکانی ئەمریکا دانوستانی لەگەڵدا ناکات و سەرنجی تەواوەتی لەسەر حکومەتی لوبنانە.
هەردوو لایەنی لوبنانی و ئیسرائیلی دوو گەڕی دانوستانیان بە نێوەندگیری ئەمریکا لە واشنتن لە ڕۆژانی ١٤ و ٢٣ی نیسانی ڕابردوو ئەنجامدا، وەک ئامادەکارییەک بۆ گفتوگۆکانی ئاشتی، ئەمەش لە ناوەڕاستی دەنگۆی ئەنجامدانی گەڕی سێیەمی دانوستانەکان لە ناوەڕاستی مانگی ئایاری ئەمساڵدا.