پاش ئەوەی دیوانی باڵای کۆماری ئیسلامیی ئێران داواکاریی دووبارە دادگاییکردنەوەی پەخشان عەزیزی، زیندانیی سیاسیی کورد و خەڵکی شاری مەهابادی ڕەتکردەوە، مەترسییەکانی سەر جێبەجێکردنی سزای لەسێدارەدانەکەی قورستر و نزیکتر بوونەتەوە.
ئاوێنە: لەگەڵ دەرچوونی ئەم بڕیارەی دیوانی باڵا، ڕێکخراوەکانی بواری مافی مرۆڤ بە توندی هۆشداری دەدەن و نیگەرانیی قووڵی خۆیان لە نزیکبوونەوەی وادەی لەسێدارەدانی ئەم زیندانییە سیاسییەی ڕۆژهەڵاتی کوردستان دەردەبڕن. ئەو ڕێکخراوانە ئاماژە بەوە دەکەن کە ڕەتکردنەوەی دادگاییکردنەوەی دووبارە، نیشانەیەکی مەترسیدارە بۆ خێراکردنی پرۆسەی جێبەجێکردنی سزاکەی.
جێی بیرهێنانەوەیە، پەخشان عەزیزی لە ساڵی ٢٠٢٣دا لە شاری تاران لەلایەن هێزە ئەمنییەکانەوە دەستبەسەرکرا. دواتر لەلایەن دادگای تارانەوە بە تۆمەتی "ئەندامبوون لە پارتە کوردییەکان" دادگایی کرا و سزای قورسی لەسێدارەدانی بەسەردا سەپێندرا. لەو کاتەوە تا ئێستا، ناوبراو لە زیندانی ئێڤین لە تاران ڕاگیراوە و لە ژێر هەڕەشەی بەردەوامی جێبەجێکردنی سزاکەیدایە.