مەهدی زانا، سەرۆکی پێشووی شارەوانی ئامەدو هاوسەری لەیلا زانا، لە تەمەنی ٨٥ ساڵیدا لە کۆچی دوایی کرد.

ئاوێنە: مەهدی زانا، سەرۆکی پێشووی شارەوانی ئامەد کە لەنەخۆشخانە و لە چاودێری چڕدا چارەسەری نەخۆشی COPDی بۆ کرابوو، کۆچی دوایی کرد.

سبەی پرسەی زانا لەئامەد بەڕێوە دەچێت.

دەم پارتی لەپەیامێکدا کە لە هەژماری سۆشیال میدیای خۆیدا دوای مردنی زانا بڵاویکردەوە، رایگەیاند "بەداخ و پەژارەیەکی زۆرەوە زانیمان کە مەهدی زانا یەکێک لە کەسایەتییە بەنرخەکانی خەباتی گەلی کورد بۆ ئازادی و دیموکراسی کۆچی دوایی کرد، سەرەخۆشی لە بنەماڵە و کەسوکار و ئازیزان و گەلی کورد دەکەین. قەرزاری ئەوین بەخەبات و یادەوەرییەکەی، بپ بنیاتنانی ئاشتییەکی شکۆمەندانە کە گەلان بە یەکسانی و ئازادانە تێیدا بژین. لەبەردەم یادەوەرییەکەی و خەباتەکەیدا بەڕێزەوە سەر دادەنەوێنین”.

مەهدی زانا کێ بوو؟

مەهدی زانا لە ٢٠ی کانوونی دووەمی ١٩٤٠ لە ناحیەی سیلڤانی سەر بەئامەد لەدایکبووە. دواتر ناوی بنەماڵەکەی لە "بیلیچی"ەوە گۆڕی بۆ "زانا" کە بە کوردی بەواتای "ژیر" دێت.

مەهدی زانا، برای شوکران زانا، ئەندامی پێشووی پەرلەمانی دەم پارتیە.

مەهدی  لەساڵی ١٩٧٥ لەگەڵ لەیلا زانا ئەندامی پێشووی پەرلەمانی هەدەپە هاوسەرگیری کردووە، زانا باوکی دوو منداڵ بووە.

زانا کە لە تەمەنێکی لاویدا هاتە ناو سیاسەتەوە، لە ڕێبەرانی ناوەندە ڕۆشنبیرییە شۆڕشگێڕەکانی کورد بوو. لە ساڵی ١٩٦٣ پەیوەندی بە پارتی کرێکارانی تورکیاوە کردووە؛ بەشداری لە دامەزراندنی لقی سیلڤانی پارتەکەدا کردووە و بۆ ماوەی دوو ساڵ وەک سەرۆکی لقەکە کاری کردووە.

زانا کە لە هەڵبژاردنە خۆجێیەکانی ساڵی ١٩٧٨ وەک کاندیدێکی سەربەخۆ بە سەرۆکی شارەوانی ئامەد هەڵبژێردرا، دوای کودەتا سەربازییەکەی ١٢ی ئەیلولی ١٩٨٠ دەستگیرکرا، بەهۆی ئەو سزایانەی کە بەسەریدا سەپێندرا، لەئامەد، ئایدن، ئەفۆنکاراهیسار و ئەسکیشەهیر زیندانی کرا.

زانا کە لەقۆناغە جیاوازەکانی ژیانیدا بە گشتی ١٦ ساڵ لەزینداندا ژیانی بەسەر برد، دواتر لەساڵی ١٩٩٤ تورکیای بەجێهێشت‌و نزیکەی ١٠ ساڵ لە سوید ژیا.

زانا کە لە مانگی تشرینی یەکەمی ساڵی ٢٠٠٤ گەڕایەوە بۆ تورکیا، لە پەیوەندی لەگەڵ دۆسیەکانی دژی زانا دەستبەسەر کراو دواتر ئازاد کرا.