ده‌زگای ئاسایشی هه‌رێم دەستگیرکردنی باندێکی ساختەکردنی شوێنەواری له سنوری پارێزگای سلێمانی راگه‌یاند كه هه‌ڵساون به دروستكردنی سكه‌ی مێژویی و كه‌لوپه‌لی شوێنه‌وار به ئامانجی ساغكردنه‌وه‌یان له‌ناو هه‌رێمی كوردستان و ده‌ره‌وه‌ی وڵات.
ئاوێنه: ده‌زگای ئاسایشی هه‌رێم، ئه‌مڕۆ یه‌كشه‌ممه، له راگه‌یه‌ندراوێكدا وتی، بەرێوەبەرایەتی لێکۆڵینەوە له ده‌زگاكه‌یان بەهەماهەنگی بەڕێوەبەرایەتی گشتی ئاسایشی پارێزگای سلێمانی، لەڕۆژی 3/8/2026 لەسنوری پارێزگای سلێمانی توانیان باندێکی پێنج کەسی ساختەکردنی سکەی مێژویی و شوێنەوار دەستگیربکەن.
ده‌زگای ئاسایش وتویه‌تی "دوای بەدواداچون و کۆکردنەوەی زانیاری، دەرکەوت ئەم باندە سەرقاڵی دروستکردنی سکەی مێژویی و کەلوپەلی شوێنەواربون، ئامانجیان ساختەکردن و ساغکردنەوەیان بوە لەناو هەرێمی کوردستان و دەرەوەی وڵات."
ئاماژه‌ی به‌وه‌شداوه، لەئێستادا تۆمەتباران بەماددەی 24 لەیاسای شوێنەوار ڕاگیراون و لێکۆڵینەوە لەدۆسیەکانیان بەردەوامە.