دەوڵەت باخچەلی، سەرۆکی پارتی بزوتنەوەی نەتەوەپەرست (مەهەپە)، زەنگی مەترسی بۆ داهاتووی وڵاتەکەی لێدەدات و هۆشداری دەداتە ناوەندەکانی بڕیار کە بەهۆی گۆڕانکارییە خێراکانی ناوچەکەوە، تورکیا ئامانجی داهاتووی زلهێزەکانە لە دوای ئێران. بۆ بەرپەرچدانەوەی ئەم مەترسییەش، بەپەلە جەخت لە چارەسەرکردنی پرسی کورد دەکاتەوە.
ئاوێنە: وەک هاوپەیمانێکی ستراتیژی و سەرەکیی ڕەجەب تەیب ئەردۆغان، سەرۆکی مەهەپە پەیامێکی توند سەبارەت بەو پێشهاتە هەرێمییانە دەداتە ناوخۆ و دەرەوەی وڵاتەکەی. لە لێدوانەکەیدا باخچەلی بە ڕوونی دەڵێت: "ئەو هەڕەشە و پەلامارە نێودەوڵەتییانەی کە ئەمڕۆ لەلایەن هێزە هەژمونخوازە جیهانییەکانەوە ئاراستەی ئێران دەکرێن، بێ هیچ گومانێک سبەینێ تورکیا دەکەنە ئامانج."
بۆ ڕووبەڕووبوونەوەی ئەم مەترسییە گەورانە، باخچەلی بە گرنگییەوە باس لە پرسی کورد و دەستپێشخەرییەکانی تایبەت بە چارەسەرکردنی ئەو پرسە دەکات. ئەو پێیوایە ئەم هەنگاوە تەنها بڕیارێکی ئاسایی نییە، بەڵکو پەنابردنە بۆ "سیاسەتێکی دەوڵەت کە توانای خوێندنەوەی ڕۆحی سەردەم و گۆڕانکارییەکانی هەیە". هاوکات هۆشداریش دەدات، هەر هەنگاوێک لە کاتی گونجاوی خۆیدا نەگیرێتەبەر و دوابخرێت، لە داهاتوودا دەبێتە قورسایی و باجێکی گەورە بەسەر شانی نەوەکانی داهاتووەوە.
سەرۆکی مەهەپە تێڕوانینی خۆی بۆ دۆخی هەنوکەیی جیهان و ڕۆژهەڵاتی ناوەڕاست دەخاتەڕوو، کە بە "بیابانێک" لە نادڵنیایی و ناسەقامگیری وەسفی دەکات، شوێنێک کە ئاراستەکان تێیدا ون بوون. بە بڕوای ئەو، تاکە ڕێگەی دەربازبوون بۆ هەڵوەشاندنەوەی پیلانی هێزە ئیمپریالیستەکان و دانانی خاڵی کۆتایی بۆ شەڕی بەوەکالەت لە ناوچەکەدا، هەنگاونانە بەرەو بونیادنانی "تورکیایەکی نوێ کە بەدەر بێت لە جەنگ و ململانێ".
لە کۆتایی پەیامەکەیدا، دەوڵەت باخچەلی ئەم هەنگاوانە وەک "پڕۆژەی برایەتیی گەلی تورکیا" ناوزەد دەکات کە ڕەگ و ڕیشەی لە مێژوویەکی هەزار ساڵەدا هەیە. دووپاتیشی دەکاتەوە کە سەرخستنی ئەم پڕۆژەیە، مەرجی بنەڕەتی و سەرەکییە بۆ دروستکردنی یەکڕیزییەکی بەهێزی ناوخۆیی و قایمکردنی پێگەی تورکیا لەناو هاوکێشە و هاوسەنگییە ئاڵۆزەکانی جیهاندا.