لێپرسراوانی کەرتی غاز لە پارێزگای سلێمانی هۆشداری دەدەنە هاوڵاتیان کە لە پشووەکانی جەژنی قورباندا، بە هیچ شێوەیەک غاز بە نرخی گرانتر لە نرخی ئاسایی خۆی نەکڕن. سەرۆكی ئەنجومەنی كارگەكانی غازی شارەکە جەخت لەوە دەکاتەوە کە بڕی تەواو و پێویستی غاز ڕادەستی بریکارەکان کراوە و هاوڵاتیان بە ئاسانی دەستیان پێی دەگات.
ئاوێنە: لەم بارەیەوە، کۆچەر تاهیر، سەرۆکی ئەنجومەنی کارگەکانی غاز لە سلێمانی ئاماژەی بەوە کرد؛ تەنیا لە ڕۆژی عەرەفەدا، ١٢ کارگەی بەرهەمهێنانی غاز بەوپەڕی توانا و وزەی خۆیانەوە کاریان کردووە. لە ئەنجامی ئەم هەوڵە چڕەشدا، توانراوە بڕی زیاتر لە ٢٠ هەزار بوتڵی غاز بەسەر بریکارەکانی دابەشکردندا دابەش بکرێت و بخرێتە خزمەتی بازاڕەوە.
سەبارەت بە چۆنیەتی دەستکەوتنی غاز لە ڕۆژانی جەژندا، کۆچەر تاهیر ئەوەی خستەڕوو کە لە سێ ڕۆژی یەکەمی جەژنی قورباندا، سەرجەم کارگەکانی غاز و ئەو ئۆتۆمبێل و بریکارانەی غاز بەناو گەڕەکەکاندا دەگێڕن، لە پشوودا دەبن و کار ناکەن. بەڵام وەک جێگرەوەیەک، هاوڵاتیان دەتوانن لە کاتی پێویستدا ڕاستەوخۆ پەیوەندی بە بریکارە جێگیرەکان و غازفرۆشەکانی ناو گۆڕەپانەکانەوە (گۆڵانەکان) بکەن، چونکە بڕی پێویستی غازیان لەلا کۆگاکراوە بۆ پڕکردنەوەی پێداویستییەکان.
لە کۆتایی لێدوانەکەیدا، سەرۆکی ئەنجومەنی کارگەکان پەیامێکی تایبەتی دڵنیاییشی ئاراستەی خاوەن چێشتخانە، هۆتێل، فڕن و نانەواخانەکان کرد کە لە ڕۆژانی جەژندا کراوە دەبن و لە خزمەتکردن بەردەوام دەبن. ناوبراو ڕایگەیاند کە پێشوەختە سەرجەم بریکارەکانیان ڕاسپاردووە بڕی پێویست و تەنانەت بڕی زیادەش لە بوتڵی غازیان بۆ دابین بکەن، تاوەکو لەو ڕۆژانەدا ڕووبەڕووی هیچ جۆرە قەیرانێک نەبنەوە و کارەکانیان بەبێ غاز پەکی نەکەوێت.