لە لێدوانێکی نوێدا کە ئاراستەی واشنتۆن کراوە، بەرپرسێکی باڵای ئێران ئاشکرای دەکات کە هەر جۆرە ڕێککەوتنێک لە نێوان تاران و ویلایەتە یەکگرتووەکانی ئەمریکا، بە تەواوی پەیوەستە بە مەرجی گەڕاندنەوەی ئەو سەرمایە زەبەلاحەی ئێرانەوە کە لەلایەن ئەمریکاوە دەستی بەسەردا گیراوە.
ئاوێنە: ئەمڕۆ، موحسین ڕەزایی، کە وەک ڕاوێژکاری موجتەبا خامنەیی، ڕابەری باڵای ئێران کاردەکات، لە میانی لێدوانێکیدا بۆ تۆڕی هەواڵی (سی ئێن ئێن - CNN)ی ئەمریکی، پەیامێکی یەکلاکەرەوەی سەبارەت بە چارەنووسی ڕێککەوتنەکانی نێوان هەردوو وڵات بڵاوکردەوە. ناوبراو بە ڕوونی جەختی لەوە کردەوە کە تاکە ڕێگە بۆ گەیشتن بە ڕێککەوتن لەگەڵ ئەمریکا، تەنیا لە ڕێگەی ئازادکردنی ئەو پارانەی ئێرانەوە دەبێت کە بەهۆی سزاکانی واشنتۆنەوە بلۆککراون و قەبارەکەیان دەگاتە ٢٤ ملیار دۆلار.
ئەم پێشهاتە و سووربوونی تاران لەسەر مەرجە داراییەکانی، لە کاتێکدایە کە پێشتریش موحسین ڕەزایی هۆشداریی دابوو لە بارەی ئاڵۆزییەکانی بەردەم پرۆسەی لێکتێگەیشتن. ناوبراو ڕایگەیاندبوو کە ئەو ڕێککەوتنەی ئامانج لێی کۆتاییهێنانە بە ململانێ و شەڕی نێوان ئەمریکا و ئێران، تا ئێستاش دۆخێکی تەمومژاویی هەیە و پێویستی بە شیکردنەوە و ڕوونکردنەوەی زۆر زیاتر هەیە.
لەسەر هەمان پرس و لە لێدوانەکانی پێشووتریدا، ڕەزایی ڕەخنەی لە سیاسەتەکانی سەرۆکی ئەمریکا گرتبوو و ئاماژەی بەوە کردبوو کە؛ دۆناڵد ترەمپ دەیەوێت لە ڕێگەی دروستکردنی فشاری بەردەوامەوە، تاران ناچار بکات مل بۆ مەرجەکانی واشنتۆن کەچ بکات، لە هەمان کاتیشدا بە شێوەیەکی ئامانجدار مەرج و بەرژەوەندییەکانی ئێران بە ناڕوونی دەهێڵێتەوە.