ڕێباز حەملان، یاریدەدەری مەسرور بارزانی، سەرۆکی حکومەتی هەرێمی کوردستان، نوێترین پێشهاتەکانی تایبەت بە کێشە داراییەکانی نێوان هەولێر و بەغدای خستە ڕوو و ڕایگەیاند کە هەردوو حکومەت لەسەر پرسی مووچە گەیشتوونەتە لێکتێگەیشتن و ڕێککەوتنێکی نوێ.
بەپێی لێدوانەکانی حەملان، ڕێککەوتنەکە بە جۆرێکە کە هەر کاتێک حکومەتی عێراق دەست بە دابەشکردنی مووچەی پارێزگاکانی ناوەڕاست و باشوور بکات، بە هەمان شێوە مووچەی فەرمانبەرانی هەرێمی کوردستانیش خەرج دەکرێت. لەم چوارچێوەیەدا، عەلی زەیدی (بەرپرسی دۆسیەی هەرێم لە بەغدا) بەڵێنی داوە کە هاوکات لەگەڵ پێدانی مووچەی فەرمانبەرانی پارێزگای بەسرە، مووچەی کوردستانیش دابەش بکرێت، ئەمەش بەو مەرجەی کە عێراق خۆی ڕووبەڕووی قەیرانی دارایی و کێشەی کەمیی نەختینە نەبێتەوە و توانای دابینکردنی مووچەخۆرانی عێراقی هەبێت.
لە بەشێکی دیکەی قسەکانیدا، یاریدەدەری سەرۆکی حکومەتی هەرێم تیشکی خستە سەر ئەو دۆسیانەی کە پێشتر جێگای ناکۆکی بوون و ڕوونیکردەوە کە پرسی بەکارخستنی سیستەمی ئەسیکۆدا (سیستەمی ئەلیکترۆنیی گومرگ) لەگەڵ دۆسیەی نەوت بە تەواوی چارەسەر کراون و هیچ گرفتێکیان لەسەر نەماوە لە نێوان هەردوو لادا.
سەبارەت بەو خاڵانەشی کە هێشتا بە هەڵپەسێردراوی ماونەتەوە، ناوبراو ئاشکرای کرد کە لە ئێستادا تەنها پرسی داهاتی ناوخۆی هەرێمی کوردستان ماوەتەوە بۆ ئەوەی ڕێککەوتنی کۆتایی لەسەر بکرێت. جەختی لەوەش کردەوە کە بەپێی یاسای کارگێڕی دارایی فیدراڵی، پێویستە هەرێمی کوردستان بەشێک لە داهاتە ناوخۆییەکانی ڕادەستی حکومەتی عێراق بکات، بەڵام تا ئەم ساتە بڕ و ڕێژەی ئەو پارەیە (وەک ژمارە) بە شێوەیەکی کۆتایی دیاری نەکراوە و پێویستی بە یەکلاییکردنەوە هەیە.