لە دوو ڕووداوی جیادا، هێزە ئەمنییەکانی ئێران سێ هاووڵاتیی کوردیان دەستبەسەر کردووە کە یەکێکیان مامۆستایەکی خانەنشینە، و تا ئێستاش چارەنووسیان نادیارە.
ئاوێنە: بەپێی ڕاپۆرتێکی تۆڕی مافەکانی مرۆڤی کوردستان کە لەسەر ئەم بابەتە بڵاوی کردووەتەوە، دەستبەسەرکردنی ئەم سێ هاووڵاتییە لەلایەن هێزە ئەمنییەکانەوە پشتڕاست کراوەتەوە.
لە ڕاپۆرتەکەدا ئاماژە بەوە کراوە کە لە ڕۆژی ١٢ی حوزەیرانی ئەمساڵ، هێزەکانی سەر بە وەزارەتی ئیتلاعات چوونەتە سەر ماڵی هەریەک لە سەردار ڕەحمانی و ئێحسان ڕەحمانی لە شاری کامیاران. پاش پشکنینی ماڵەکانیان و دەستبەسەرداگرتنی مۆبایلەکانیان، داوایان لێکراوە دەستبەجێ سەردانی بنکەی ئیدارەی ئیتلاعاتی شارەکە بکەن، بەڵام دوای چوونیان بۆ ئەو بنکەیە و تێپەڕبوونی چەندین کاتژمێر، چارەنووسیان بە نادیاری ماوەتەوە.
ڕاپۆرتەکە ئەوەشی خستووەتە ڕوو کە ئەم دوو برایە لە ساڵی پێشووتریشدا (٢٠٢٥)، بەهۆی بەشداریکردنیان لە ئاهەنگەکانی نەورۆز و بەکارهێنانی هێما تایبەتەکانەوە، لەلایەن هەمان دەزگاوە بانگهێشت کرابوون و بۆ ماوەی چەند کاتژمێرێک لێپرسینەوەیان لەگەڵدا کرابوو.
لەلایەکی دیکەوە، باس لەوە کراوە کە لە ڕۆژی ١٣ی حوزەیرانی ئەمساڵدا، هێزە ئەمنییەکان چوونەتە سەر ماڵی مامۆستایەکی خانەنشین بە ناوی یووسف ئەمینی لە گەڕەکی عەلیئاوای شاری بۆکان و دەستبەسەریان کردووە.
بەپێی زانیارییەکان، یووسف ئەمینی پێشتریش دوای بەشداریکردنی لە ئاهەنگێکی هاوسەرگیریدا لە شاری بۆکان، لەگەڵ چەند کەسێکی دیکەدا بانگهێشت و پاشان دەستبەسەر کرابوو. لەو ئاهەنگەدا بەشێکی زۆر لە ئامادەبووان جلوبەرگی خاکی ڕەنگیان لەبەر کردبوو.
لە کۆتایی ڕاپۆرتەکەدا هاتووە، دەوترێت بەهۆی ئەوەی ئەو جۆرە جلوبەرگانە لە پۆشاکی پێشمەرگەی حزبە کوردییەکان دەچێت، بووەتە هۆکاری ئەوەی دەزگا ئەمنییەکانی ئێران بەشداربووانی ئەو ڕێوڕەسمانە بانگهێشت بکەن و لێپرسینەوەیان لەگەڵدا بکەن.