محه‌مه‌د حه‌كیم، وته‌بێژی كۆمه‌ڵی دادگه‌ریی كوردستان، رێككه‌وتنی ده‌سه‌ڵاتدارانی دیمه‌شق له‌گه‌ڵ ده‌سه‌ڵاتدارانی رۆژئاوای كوردستان به "دروستترین هه‌نگاو" ناوده‌بات و ده‌ڵێت: بەو هیوایەی دەسەڵاتدارانی ئەمڕۆی شام، ئیسلام بکەنە بنەمای مامەڵەیان لەگەڵ برایانی کوردیانداو بەردەوام بن لە هەڵگرتنی ستەمەکانی دەیان ساڵەی سەر میللەتی کورد لەو وڵاتە .
ئاوێنه: محه‌مه‌د حه‌كیم، وته‌بێژی كۆمه‌ڵی دادگه‌ریی كوردستان، ئه‌مڕۆ چوارشه‌ممه، له راگه‌یه‌ندراوێكدا وتی"کاتی دەستخۆشییە، نەک ڕەخنەگرتن. ئەو هەنگاوەی نراوە، دروستترینی ئەم قۆناغەیە. بە دیدی ئێمە، خۆزگە هەر لە سەرەتای ڕزگاربونی سوریاوە بنرایە تا ئەو هەمو قوربانییەش نەدرایە."
وتوشیه‌تی "بە هەر حال، بڕیاری دروست لە ڕێگەی تێگەیشتن لە واقیعی سیاسی، خوێندنەوەی باشی مێژو و دۆخی ناوچەکە، تێگەیشتنی تەواو لە ناوەندەکانی بڕیار (دۆستەکان)، و دیاریکردنی ئامانجە درێژخایەنەکان و کارکردن لەسەر ئەولەویەتەکان دەدرێت."
ئاماژه‌ی به‌وه‌شداوه "سیاسەت بە لۆژیک و شیکردنەوەی بەرژەوەندییەکان بەڕێوە دەچێت، نەک بە هەڵچوونی سۆزداریی نێو تۆڕە کۆمەڵایەتییەکان!"
جه‌ختیشی كردۆته‌وه "بۆ ئەم قۆناغە، هەر هەنگاوێکی ڕاست بۆ خزمەتکردن بە کوردانی پارچەکانی تر، جێی دەستخۆشی و پشتیوانییە، نەک لۆمە و ڕەخنەگرتن."
ئه‌وه‌شی خستۆته‌ڕو "پێرۆزبایی و دەستخۆشی لە کوردانی ڕۆژئاوا دەکەم و ئومێدی سەرکەوتنی زیاتر و بەدەستهێنانی مافەکانیان بۆ دەخوازم، بەو هیوایەش دەسەڵاتدارانی ئەمڕۆی شام، ئیسلام بکەنە بنەمای مامەڵەیان لەگەڵ برایانی کوردیاندا وبەردەوام بن لە هەڵگرتنی ستەمەکانی دەیان ساڵەی سەر میللەتی کورد لەو وڵاته."