لە پێشهاتێکی خێرا و چاوەڕواننەکراودا لە گۆڕەپانی سیاسی و سەربازیی سوریادا، هێزەکانی سوریای دیموکرات (هەسەدە) هەڵوەشاندنەوەی قەوارەی سەربازیی خۆی و یەکگرتنی لەگەڵ سوپای سوریا ڕاگەیاند، ئەمەش هاوکاتە لەگەڵ ئامادەکارییەکان بۆ دەرکردنی چەند مەرسومێکی سەرۆکایەتی کە پێگەی سیاسیی کورد و مافی خوێندن بە زمانی کوردی لە وڵاتەکەدا یەکلایی دەکەنەوە.
ئاوێنە: دوای کۆبوونەوەیەکی چارەنووسساز کە ڕۆژی سێشەممە لە کۆشکی گەل لە دیمەشق بەڕێوەچوو، مەزڵوم عەبدی، فەرماندەی گشتیی پێشووی هەسەدە، لە کۆنگرەیەکی ڕۆژنامەوانیدا کۆتاییهێنان بە هێزەکانی سوریای دیموکراتی ڕاگەیاند. ناوبراو لە وتەکانیدا جەختی لەوە کردەوە کە سەرجەم ئامادەکارییەکان بۆ تێکەڵبوونی ڕیزەکانیان بە سوپای فەرمیی سوریا بەکۆتا گەیشتوون و چوونەتە بواری جێبەجێکردنەوە.
لە لایەکی دیکەوە، سەرچاوە حکومییە ئاگادارەکان ئاشکرایان کردووە کە ئەحمەد شەرع، سەرۆکی سوریا، لە ئامادەکاریدایە بۆ دەرکردنی سێ مەرسومی سەرۆکایەتیی گرنگ. بەپێی زانیارییەکانی پێگەی "نۆرس پرێس"، مەرسومە چاوەڕوانکراوەکان ئەم بڕیارانە لەخۆ دەگرن:
مەرسومی یەکەم: دیاریکردنی مەزڵوم عەبدی وەک ڕاوێژکاری سەرۆکی سوریا (ئەحمەد شەرع).
مەرسومی دووەم: دامەزراندنی ئیلهام ئەحمەد، کەسایەتیی دیاری سیاسیی کورد، وەک ئەندام لە ئەنجومەنی گەلی سوریا (پەرلەمان).
مەرسومی سێیەم: بەفەرمیکردنی خوێندن بە زمانی کوردی و دانانی میتۆد و میکانیزمی تایبەت بۆ جێبەجێکردنی ئەو پرۆسەیە لە سەرتاسەری ناوچە جیاوازەکانی سوریادا.
ئەم وەرچەرخانە بنەڕەتییە ڕاستەوخۆ دوای کۆبوونەوە لوتکەییەکەی کۆشکی گەل دێت کە تیایدا ئەحمەد شەرع پێشوازی لە شاندێکی باڵای کورد کرد بە سەرۆکایەتیی مەزڵوم عەبدی و ئیلهام ئەحمەد و ژمارەیەک لە بەرپرسانی دیکە، کە وەک هەنگاوێکی کرداری بۆ داڕشتنەوەی نەخشەی سیاسی و ئەمنیی ناوخۆی سوریا سەیر دەکرێت.