بەڕێوەبەرایەتیی پۆلیسی دارستان و ژینگەی گەرمیان، ئاماری کار و چالاکییەکانی خۆی تایبەت بە ماوەی قەدەغەکردنی ڕاوەماسی بڵاوکردەوە و ڕایگەیاند، لەو ماوەیەدا دەیان کەس بەهۆی سەرپێچیکردنەوە دەستگیرکراون و دەستیش بەسەر بڕێکی زۆر لە ئامرازەکانی ڕاوکردندا گیراوە.
ئاوێنە: بەپێی ڕاگەیەندراوێکی فەرمیی بەڕێوەبەرایەتییەکە، کە تێیدا تیشک خراوەتە سەر وردەکارییەکانی سێ مانگی ڕابردووی وەرزی قەدەغەکردنی ڕاوەماسی، بڕیاری قەدەغەکردنەکە لە ڕێکەوتی ١٥ی ئاداری ٢٠٢٦ـەوە چووەتە بواری جێبەجێکردنەوە و تاوەکوو ١٥ی حوزەیرانی ٢٠٢٦ بەردەوام بووە.
لەو چوارچێوەیەدا و بە مەبەستی جێبەجێکردنی بڕیارەکە و پاراستنی سامانی ماسی لە ڕووبار و دەریاچەکاندا، سەرجەم مەفرەزەکانی پۆلیسی دارستان لە بەش و بنکەکانی سەر بە بەڕێوەبەرایەتییەکە، لە تەواوی سنوورە ئاوییەکانی ناوچەکەدا خراونەتە حاڵەتی ئامادەباشیی تەواوەوە بۆ ڕێگریکردن لە هەر جۆرە سەرپێچییەک.
لە بەشێکی دیکەی ڕاگەیەندراوەکەدا ئاماژە بەوە دراوە، لە دەرەنجامی ئەو چاودێرییە چڕەی لەو سێ مانگەدا هەبووە، توانراوە ٢٢ کەس بە تۆمەتی سەرپێچیکردن و ڕاوکردنی نایاسایی دەستگیر بکرێن. هاوکات، هێزەکانیان دەستیان گرتووە بەسەر کۆمەڵێک کەرەستە و ئامرازی جۆراوجۆردا کە پێکهاتوون لە: یەک تۆڕی ماسیگرتن، ٧٥ قوولاب، سێ چووپ، یەک چەکی بادی، یەک ماتۆڕسکیل، لەگەڵ بڕی ١٥ کیلۆگرام ماسیی ڕاوکراو.
