سوپای ئیسرائیل، ئەمڕۆ پێنجشەممە، ڕایگەیاند کە لە ئەنجامی ڕووبەڕووبوونەوە سەربازییەکانی باشووری لوبناندا، سەربازێکی یەدەگیان بە ناوی "ئەلێکساندەر ڤیلین" (تەمەن ٢٩ ساڵ) کوژراوە، و حەوت سەرباز و ئەفسەری دیکەش بریندار بوون.
ئاوێنە: ئەم پەرەسەندنە مەیدانییە لە کاتێکدایە کە ناوچەکە لەبەردەم قۆناغێکی هەستیاردایە؛ بەو پێیەی تەنها چەند کاتژمێرێک دوای ئەم ڕووداوە، واژۆکردنی یاداشتنامەیەکی لێکتێگەیشتن لە نێوان دۆناڵد ترەمپ و مەسعود پزیشکیان بە مەبەستی کۆتاییهێنان بە ململانێکانی ڕۆژهەڵاتی ناوەڕاست ڕاگەیەندرا.
سەرەڕای ڕاگەیاندنی ئەم لێکتێگەیشتنە دیپلۆماسییە و کەمبوونەوەی ڕێژەیی هێرشەکان، بەڵام ئاڵوگۆڕی تەقە و پێکدادانەکان لە نێوان سوپای ئیسرائیل و هێزەکانی حزبوڵڵا بە تەواوی ڕانەگیراون و گرژییەکان لەسەر زەوی بەردەوامن.
بەپێی دوایین ئامارە فەرمییەکان، لە سەرەتای دەستپێکردنی ئۆپەراسیۆنە سەربازییەکانی ئیسرائیلەوە لە لوبنان، زیاتر لە ٣,٨٠٠ کەس گیانیان لەدەستداوە. لە بەرامبەردا، لە ڕێکەوتی ٢ـی ئازارەوە تا ئێستا، ٣١ سەرباز و فەرمانبەرێکی مەدەنیی ئیسرائیلی لە ئەنجامی ئەم شەڕ و پێدادانانەدا کوژراون.